Tizim Qoʻyliq koʻprigidan keyingi «Qoʻyliq ota» maqbarasidan OʻzBUMgacha boʻlgan yoʻnalishda joriy etilgan va sutka davomida ishlaydi.
Markaz maʼlumotiga koʻra, aholi ushbu koʻchada «yashil toʻlqin»ni sozlash zarurligi haqida bir necha bor murojaat qilgan. Shundan soʻng mutaxassislar uchastkadagi svetoforlarning ishini oʻzaro muvofiqlashtirgan.
Oʻlchovlarda avval tigʻiz boʻlmagan paytda yoʻlni bosib oʻtish 12–13 daqiqa olgan boʻlsa, hozir taxminan 9 daqiqa kifoya qilayotgani qayd etilgan.
«Yashil toʻlqin» barcha chorrahalarda chiroq doimo yashil yonib turishini anglatmaydi. Svetoforlar haydovchi belgilangan tezlikda harakatlanganida imkon qadar koʻproq chorrahadan yashil chiroqda oʻtishi uchun moslashtiriladi.
Tizimning vazifasi - qizil chiroqda toʻxtashlar sonini kamaytirish, harakatni bir maromda tashkil etish va yoʻlga ketadigan vaqtni qisqartirish.
Fargʻona yoʻli koʻchasi poytaxtning asosiy kirish transport yoʻlaklaridan biri hisoblanadi. Qoʻyliq yoʻnalishidan kelayotgan katta avtomobil oqimi shu koʻcha orqali shaharning markaziy qismi tomon taqsimlanadi.
Mutaxassislar kun davomida transport harakatini kuzatib bormoqda. Zarur hollarda svetoforlarning ish rejimlariga qoʻshimcha oʻzgartishlar kiritiladi.
