Namanganda jamoat avtobusida o‘ziga nisbatan shahvoniy shilqimlik qilingan 19 yoshli qizga nisbatan chiqarilgan sud qarori bekor qilindi. Apellyatsiya instansiyasi uning erkakni urgan harakatlarini zaruriy mudofaa holatida sodir etilgan, deb topdi. Bu haqda Namangan viloyat sudlari telegram kanali xabar berdi.
Hodisa 2026-yil 27-iyul kuni sodir bo‘lgan. 67 yoshli erkak jamoat avtobusida qizning son qismidan ushlab, unga shahvoniy shilqimlik qilgan. Qiz esa bunga javoban erkakni urgan.
Shundan so‘ng jinoyat ishlari bo‘yicha Namangan shahar sudi erkakni Ma’muriy javobgarlik to‘g‘risidagi kodeksning 41-1-moddasi (Shahvoniy shilqimlik qilish) 1-qismida nazarda tutilgan huquqbuzarlikni sodir etgan deb topgan. Unga BHM ikki baravari - 824 ming so‘m miqdorida jarima tayinlangan. Qayd qilish joiz, ushbu moddada jazo choralari BHM 2 baravaridan 5 baravarigacha jarima yoki 5 sutkagacha ma’muriy qamoqni nazarda tutadi, ya’ni sud erkakka eng yengil jazo bergan.
Qiz esa MJtKning 52-moddasi 2-qismi (Qasddan yengil tan jarohati yetkazish) bo‘yicha aybdor deb topilib, uning yengillashtiruvchi va shaxsiy holati inobatga olingan holda BHM yarim baravari - 206 ming so‘m jarimaga tortilgan.
Qiz birinchi instansiya sudi qaroridan norozi bo‘lib, apellyatsiya shikoyati bergan. 12-avgust kuni shikoyat Namangan viloyat sudining apellyatsiya instansiyasida ko‘rib chiqildi.
Apellyatsiya sudi qizning erkakka nisbatan qilgan harakatlari «zaruriy mudofaa holatida sodir etilgan», degan xulosaga keldi. Shu asosda unga oid ma’muriy ish MJtKning 271-moddasi 4-bandiga muvofiq tugatildi.
Shu bilan birga, apellyatsiya instansiyasi erkakka nisbatan tayinlangan jazoni ham qayta ko‘rib chiqdi. Sud birinchi instansiya A.N.ga jazo tayinlashda uning huquqbuzarligi ijtimoiy xavfliligini yetarlicha hisobga olmagan, degan xulosaga kelgan.
Natijada sud qarorining A.N.ga oid qismi bekor qilinib, unga nisbatan og‘irroq jazo tayinlandi. Biroq sud tomonidan A.N.ga qanday yangi jazo tayinlangani ochiqlanmagan.
