Uning aytishicha, agar hukumat tomonidan amnistiya qo‘llanib, ob’yekt tegishli ro‘yxatga kiritilsa, bino avval instrumental-texnik tekshiruvdan o‘tkaziladi. Unda ob’yektning belgilangan talablarga muvofiqligi, shuningdek, uni mustahkamlash imkoniyati bor-yo‘qligi aniqlanadi. Agar bino texnik talablarga javob bersa va zarur kamchiliklar bartaraf etilsa, u foydalanishga qabul qilinishi mumkin. Shundan so‘ng davlat dalolatnomasi rasmiylashtirilib, mulk huquqi e’tirof etiladi. Vazirlik vakili talablarga javob bermaydigan binolarni buzish vakolati biror davlat organiga to‘g‘ridan-to‘g‘ri berilmaganini ta’kidladi.
«Agarda bino hech qanday talabga javob bermasa yoki boshqa sabablarga ko‘ra qurilishi to‘xtatilgan ob’yekt bo‘lsa, buni to‘g‘ridan-to‘g‘ri hech qaysi organ buzish vakolatiga ega emas. Bu faqat sud tartibi orqali amalga oshiriladi», - dedi Javohir Ergashboyev.
Eskrou tizimi qurilishi tugallanmagan uylarga pul to‘lash xavfini kamaytiradi
Qurilish vazirligi vakili suhbat davomida yangi eskrou tizimi haqida ham ma’lumot berdi.
Uning ta’kidlashicha, tizimning asosiy maqsadi - fuqarolarning qurilayotgan uylarga to‘lagan mablag‘larini himoya qilish va quruvchi tomonidan majburiyatlar bajarilmay qolishi xavfini kamaytirish.
Yangi tartib bilan ob’yekt bo‘yicha loyihalash ishlari amalga oshirilgandan keyin qurilishni boshlash uchun zarur mablag‘ning belgilangan qismi maxsus hisobraqamga joylashtirilishi kerak bo‘ladi. Vazirlik vakili bu mexanizm orqali fuqarolarning pul to‘lab, keyin qurilishi tugallanmagan yoki boshqa sabablarga ko‘ra foydalanishga topshirilmagan uy bilan muammoga duch kelishining oldini olish maqsad qilinganini aytdi.
«Fuqarolar pulini to‘lab, aldanib qolib ketaveradimi, bino buzilib ketsa nima bo‘ladi - mana shuning oldini olish maqsadida bu tizim yaratildi», - dedi u.
Uning ma’lum qilishicha, eskrou tizimini ishga tushirish jarayoni bosqichma-bosqich amalga oshirilmoqda.
