Germaniya Qurolli kuchlarida harbiy xizmatchilar soni so‘nggi 13 yildagi eng yuqori darajaga yetdi. Germaniya Mudofaa vazirligi ma’lumotiga ko‘ra, 2026-yil iyul oyi oxirida Bundesver safida 186 700 nafar harbiy xizmat qilgan.
Bu ko‘rsatkich 2025-yil iyul oyiga nisbatan 3700 nafarga yoki 2 foizdan ko‘proqqa oshgan.
Vazirlikning ta’kidlashicha, harbiylar soni 2026-yil uchun belgilangan maqsadli ko‘rsatkichlar doirasida bormoqda.
Reuters qayd etishicha, iyul Bundesverda an’anaviy ravishda yangi ofitserlarni xizmatga qabul qilishning asosiy oylaridan biri hisoblanadi. Biroq bu yilgi o‘sishga Germaniyada harbiy xizmat bo‘yicha yangi qonunning kuchga kirishi ham sezilarli ta’sir ko‘rsatgan.
18 yoshlilarga harbiy xizmat bo‘yicha anketa yuborilmoqda
2026-yil boshidan Germaniyada 18 yoshga to‘lgan fuqarolarga olti oylik ko‘ngilli harbiy xizmatni o‘tash istagi bor-yo‘qligi haqida maxsus xat va so‘rovnoma yuborish tizimi ishga tushirildi.
Yigitlar ushbu anketani to‘ldirib, qaytarishi shart. Qizlar uchun esa so‘rovnomaga javob berish ixtiyoriy hisoblanadi.
Germaniya Mudofaa vazirligi ma’lumotiga ko‘ra, hozirgacha taxminan 378 ming nafar yoshga bunday xatlar yuborilgan.
Iyul oyining o‘zida ularning qariyb 2630 nafari harbiy xizmatga yaroqliligini baholash jarayonidan o‘tgan. Bu iyun oyiga nisbatan 35 foizga ko‘p.
Ayni paytda yangi tizim doirasida Bundesver safida qariyb 12 100 nafar ko‘ngilli va qisqa muddatli kontrakt asosidagi harbiy xizmatchi xizmat qilmoqda. Bu bir yil avvalgi ko‘rsatkichdan taxminan 6 foiz yuqori.
Harbiy xizmatga arizalar 26 foizga oshdi
Germaniya Mudofaa vazirligi kontrakt asosida harbiy xizmat o‘tash istagini bildirganlar sonida ham sezilarli o‘sish qayd etgan.
Xususan, 2026-yil iyul oyida 47 300 kishi tegishli ariza topshirgan. Bu 2025-yilning shu davriga nisbatan 26 foizga ko‘p.
Iyul oyi oxiri holatiga Bundesver safiga qabul qilingan yangi harbiylar soni 15 400 nafarni tashkil etgan. Bu o‘tgan yilga nisbatan 12 foizlik o‘sish demakdir.
