Iqtisodiy hamkorlik va taraqqiyot tashkiloti (OECD) o‘tkazadigan PISA xalqaro tadqiqotining 2022-yilgi natijalarida Singapur matematika bo‘yicha eng yuqori natijani ko‘rsatgan.
Singapurlik 15 yoshli o‘quvchilar matematika savodxonligi bo‘yicha o‘rtacha 575 ball to‘plagan. Bu OECD davlatlarining o‘rtacha natijasidan 100 balldan ziyod yuqori.
Qayd etilishicha, Singapurning ko‘rsatkichi 2018-yilga nisbatan 6 ballga oshgan. Ayni paytda OECD mamlakatlarining matematika bo‘yicha o‘rtacha natijasi 2022-yilda 472 ballni tashkil etgan. Bu 2018-yilgi ko‘rsatkichdan 15 ballga past.
Reytingda ikkinchi o‘rinni Xitoyning maxsus ma’muriy hududi Makao 552 ball bilan egallagan. Uchinchi o‘rinda 547 ball to‘plagan Tayvan joylashgan.
Kuchli beshlikdan Hongkong - 540 ball va Yaponiya - 536 ball bilan o‘rin olgan.
Yevropa davlatlari orasida eng yuqori natijani Estoniya ko‘rsatgan - 510 ball. Shuningdek, Shveysariya va Niderlandiya ham matematika savodxonligi bo‘yicha kuchli o‘ntalikka kirgan.
Infografikaga 425 balldan kam natija ko‘rsatgan davlat va hududlar kiritilmagan. Ular orasida Qatar, Meksika, Indoneziya va Marokash ham bor.
PISA tadqiqotida ishtirok etgan 81 davlat va hudud orasida matematika bo‘yicha eng past natijalar Kambodja, Paragvay va Dominikan Respublikasida qayd etilgan. Ularning har biri 340 balldan kam natija ko‘rsatgan.
Shu bilan birga, 2022-yilgi PISA tadqiqotida materik Xitoy natijalari hisobga olinmagan. Xitoy 2018-yilgi tadqiqotda yetakchi bo‘lgan.
Rossiya ham 2022-yilgi test sinovlarida ishtirok etmagan. 2018-yilda rossiyalik o‘quvchilar matematika savodxonligi bo‘yicha o‘rtacha 488 ball to‘plagan.
