1964-yilda ishlab chiqarilgan Shelby Cobra Daytona kupesi 42,9 million dollarga sotildi va bu Amerika avtomobillari orasida rekord natija bo‘ldi, deb xabar berdi Gooding & Christie’s auksion uyi.
Modelning dastlabki bahosi 25 million dollardan oshiq edi. Yakuniy narx esa dastlabki taxmindan deyarli ikki baravar ko‘p bo‘ldi. Bundan avvalgi rekord 1935-yilgi Duesenberg SSJ avtomobiliga tegishli bo‘lib, 2018-yilda 22 million dollarga sotilgandi.
Shelby Cobra Daytona poygalarda qatnashish va Ferrari 250 GTO bilan raqobatlashish uchun ishlab chiqilgan. Model Britaniyaning AC Ace rodsteri asosida yaratilgan bo‘lib, V8 dvigateli va yangi aerodinamik kuzov bilan jihozlangan.
Umumiy hisobda jami oltita Daytona Coupe avtomobili ishlab chiqarilgan. Aynan shu nusxa «Le-Man 24 soati» va Nyurburgringdagi poygalarda qatnashgan.
