O‘zbekiston Fanlar akademiyasi Energetika muammolari instituti olimlari va tadqiqotchilari tomonidan Jizzax magistral elektr tarmoqlari filialining 110/10 kV “Chilonzor” podstansiyasida tadqiqotlar o‘tkazildi.
Akademiya matbuot xizmati xabariga ko‘ra, tadqiqotlar natijasida elektr tarmog‘idagi yo‘qotishlar darajasi, transformator yuklanish rejimi, reaktiv quvvat balansining holati hamda izolyatsiya resursining eskirish ko‘rsatkichlari chuqur tahlil qilingan.
“Olib borilgan tadqiqotlar natijasida reaktiv quvvatni kompensatsiyalovchi qurilmalarni o‘rnatish orqali quvvat koeffitsiyenti ko‘rsatkichini me’yoriy darajaga yaqinlashtirish, SCADA tizimi asosida masofadan boshqarish va real vaqt rejimida nazorat qilish imkoniyatlarini joriy etish, yuklama grafigini optimallashtirish maqsadida iste’mol profilini raqamli modellashtirish va boshqa bir qancha ilmiy asoslangan tavsiyalar ishlab chiqildi.
Ilmiy asoslangan yechimlarning amaliyotga joriy etilishi natijasida texnik yo‘qotishlar sezilarli darajada kamayishi, elektr ta’minoti ishonchliligi oshishi hamda mamlakat energetika xavfsizligini mustahkamlashga qaratilgan davlat siyosatining samarali amalga oshirilishiga olib keladi”, – deyiladi xabarda.
