Visual Capitalist taqdim etgan infografikada Resume.io tadqiqoti asosida 2025-yilda 185 davlatdagi qonun bilan belgilangan yillik haq to‘lanadigan ta’til hamda haq to‘lanadigan davlat bayramlari kunlari taqqoslangan.
Tadqiqotga ko‘ra, reytingga kiritilgan mamlakatlarda xodimlar uchun yillik haq to‘lanadigan ta’til va bayram kunlarining umumiy miqdori o‘rtacha 30 kunni tashkil etadi.
Reytingda Eron yetakchilik qilgan. Bu mamlakatda yillik haq to‘lanadigan ta’til va davlat bayramlari jami 53 kunga yetadi. Manbada qayd etilishicha, Eronda bayram kunlarining ko‘pligi an’anaviy olti kunlik ish haftasi bilan ham bog‘liq.
Yaqin Sharqning boshqa davlatlari ham yuqori ko‘rsatkichlarga ega. Xususan, Yamanda - 45 kun, Bahraynda - 44 kun, Kuvaytda - 42 kun, Ummonda - 39 kun haq to‘lanadigan ta’til va bayram kunlari mavjud.
Bunda reytingdagi umumiy ko‘rsatkich ikki qismdan - qonun bilan kafolatlangan yillik haq to‘lanadigan ta’til hamda haq to‘lanadigan davlat bayramlaridan tashkil topadi. Shu sababli bir xil natija qayd etgan davlatlarda ta’til va bayram kunlarining nisbati turlicha bo‘lishi mumkin.
Yevropa davlatlarining aksariyati jahon bo‘yicha o‘rtacha 30 kunlik ko‘rsatkichga teng yoki undan yuqori natija qayd etgan. Masalan, Islandiyada - 40 kun, Shvetsiya, Portugaliya va Slovakiyada esa 35 kundan.
Rossiyada 2025-yil holatiga ko‘ra, umumiy ko‘rsatkich 42 kunni tashkil etgan. Shundan 28 kuni standart asosiy haq to‘lanadigan mehnat ta’tili, 14 kuni esa davlat bayramlariga to‘g‘ri keladi.
Osiyoning ayrim yirik iqtisodiyotlarida esa ko‘rsatkich jahon o‘rtachasidan ancha past. Xususan, Xitoyda - 16 kun, Hindistonda - 18 kun, Yaponiyada - 26 kun qayd etilgan.
Tadqiqotda keltirilishicha, dunyo mamlakatlarida qonun bilan belgilangan haq to‘lanadigan ta’til va bayram kunlarining jami miqdori yiliga 9 kundan 53 kungacha boradi.
