AQSh prezidenti Donald Tramp 19-avgust kuni jurnalistlar bilan suhbatda KXDR rahbari Kim Chen In bilan joriy yil oxiriga qadar uchrashishni rejalashtirayotganini ma’lum qildi.
Oq uy yaqinida qurilayotgan yangi vertolyot maydonchasini ko‘zdan kechirish chog‘ida Trampdan Kim Chen In bilan uchrashish rejasi bor-yo‘qligi so‘ralgan. AQSh prezidenti bunga «Ha, rejalashtiryapman», deb javob bergan.
Trampning ta’kidlashicha, hozirda Shimoliy Koreya ixtiyorida «57 ta juda kuchli yadroviy jangovar kallak» mavjud.
«Biz bunga hech qachon yo‘l qo‘ymasligimiz kerak edi. Agar men prezident bo‘lganimda, bunday holat yuz bermagan bo‘lardi. Ammo hozir ular unda bor», - dedi Tramp.
Shu bilan birga, AQSh rahbari Kim Chen In bilan munosabatlarini ijobiy baholadi.
«Men u bilan juda yaxshi chiqishaman. U bilan hammasi yaxshi bo‘ladi», - deya Trampning so‘zlarini keltiradi AFP.
Agentlik qayd etishicha, Tramp keltirgan raqam ekspertlarning mavjud baholariga yaqin. Mutaxassislar Pxenyan ixtiyorida taxminan 50–60 ta yadroviy jangovar kallak bo‘lishi mumkinligini taxmin qilmoqda.
Tramp bunga qadar ham Shimoliy Koreya rahbari bilan yana aloqa o‘rnatilganiga ishora qilgan edi. Jurnalistlarning ikki rahbar o‘rtasidagi muloqot qay darajada ekani haqidagi savoliga u jarayon «juda ijobiy» kechayotganini aytgan, ammo boshqa tafsilotlarni ochiqlamagan.
The Wall Street Journal 18-avgust kuni amerikalik rasmiylarga tayanib, Tramp noyabr oyida Xitoyning Shenchjen shahrida o‘tkazilishi rejalashtirilgan Osiyo-Tinch okeani iqtisodiy hamkorligi (ATES) sammiti doirasida Kim Chen In bilan uchrashish imkoniyatini ko‘rib chiqayotgani haqida xabar bergan.
Ayni paytda KXDR rahbarining singlisi Kim Yo Chjon 19-avgust kuni akasi va Tramp o‘rtasidagi yangi aloqalar haqida «mutlaqo hech narsa bilmasligini» bildirdi.
Shu bilan birga, u Kim Chen In hali ham AQSh prezidentiga nisbatan «iliq munosabatda» ekanini ta’kidlab, ikki yetakchi o‘rtasidagi shaxsiy munosabatlarni «a’lo darajada» deb baholadi.
