Arxeologik tadqiqotlar davomida qadimiy inshoot xonalaridan birining gʻarbiy devorida gil suvoq ustiga ishlangan lola va oq gullar tasviri aniqlangan.
Gul tasvirlari qizil rangdagi ingichka toʻlqinsimon chiziqlar bilan uygʻunlashtirilgan. Keyingi davrda esa ushbu devoriy surat ustidan oq ohakli suvoq qatlami tortilgani maʼlum boʻlgan.
Topilma nafaqat badiiy jihatdan, balki Boburtepadagi qadimiy inshootning vazifasini aniqlash nuqtai nazaridan ham ahamiyatli hisoblanadi.
Xususan, binoning mahobatli va qalin devorlari, shuningdek, uning ichki qismidagi bezaklar inshoot oddiy turar joy boʻlmagan boʻlishi mumkinligini koʻrsatmoqda.
Dastlabki arxeologik xulosalarga koʻra, mazkur bino milodiy IV–V asrlarda ibodatxona sifatida faoliyat yuritgan boʻlishi mumkin.
Biroq inshootning aniq vazifasi hozircha toʻliq belgilangan emas. Mutaxassislar keyingi qazishma va ilmiy tadqiqotlar orqali uning asl vazifasi, meʼmoriy tuzilishi va tarixiy ahamiyati haqida yanada aniq maʼlumotlar olish mumkinligini taʼkidlamoqda.
Boburtepadagi arxeologik tadqiqotlar Samarqand arxeologiya instituti xodimi Sanjar Abduraximov tomonidan olib borilmoqda.
