Mehnat qonunchiligiga koʻra, dam olish kunlari yoki ishlanmaydigan bayram kunlarida bajarilgan ish uchun kamida ikki hissa miqdorida haq toʻlanishi lozim.
Tashkilotning ichki hujjatlarida esa bunday kunlarda ishlaganlik uchun ikki hissadan ham koʻproq miqdorda haq toʻlash nazarda tutilishi mumkin.
Shu bilan birga, xodim dam olish yoki ishlanmaydigan bayram kunidagi mehnati uchun oshirilgan haq oʻrniga boshqa dam olish kuni berilishini tanlash huquqiga ega.
Bunday holatda xodimga ishlagan dam olish yoki bayram kuni uchun bir hissa miqdorida haq toʻlanadi va uning xohishiga koʻra boshqa dam olish kuni beriladi.
Qonunchilikda ish grafigiga muvofiq mehnat qiladigan xodimlar uchun ham alohida tartib belgilangan.
Xususan, xodim mehnat shartnomasi yoki ish jadvaliga muvofiq umumiy belgilangan dam olish kunida - besh kunlik ish haftasida shanba yoki yakshanbada, olti kunlik ish haftasida esa yakshanbada ishlasa, ammo dam olish kuni unga boshqa kunda berilsa, ushbu ish uchun bir hissa miqdorida haq toʻlanadi.
