4-sentabr kuni AQShning Vashington shtati Sietl shahrida Oʻzbekiston bosh konsulligi rasman ochildi. Marosimda ikki davlatdan rasmiylar, Vashington shtati vakillari va vatandoshlar qatnashdi. Kun.uz bilan gaplashgan Sietldagi bosh konsul Ahror Burhonovga koʻra, bu shtatda 3 mingdan ortiq oʻzbeklar yashaydi va imkoniyatlar okeandek koʻp.
Sietl AQShning shimoli-gʻarbiy nuqtasi, Tinch okeani boʻyi hududidagi shtat – Vashingtonning eng katta shaharlaridan. IT, muhandislik va ishlab chiqarish, xizmat koʻrsatishda yuksak natijalarga erishgan bu hududda katta kompaniyalar ofislari joylashgan. Shtatda bugun 3 mingdan ortiq oʻzbeklar yashaydi. Oʻzbekiston esa AQShda navbatdagi vakolatxona uchun aynan Sietlni tanladi.
4-sentabr kuni bosh konsullikning rasmiy ochilish marosimi oʻtkazildi. Tadbirda AQShdagi elchi Furqat Sidiqov, Nyu-Yorkdagi bosh konsul, BMTdagi doimiy vakil, AQSH tomonidan rasmiylar, Vashington shtati rahbariyati va yurtdoshlarimiz, faollar, biznes doiralari vakillari qatnashdi.
“AQSH bilan aloqalarimizning eng yaxshi davridamiz”, deydi elchi soʻzga chiqarkan. Bosh konsul sifatida faoliyatini boshlagan Burhonov esa ishonch uchun Amerika tomoniga minnatdorlik bildirdi.
“Biz hammasini noldan boshlamayapmiz, Sietl bilan aloqalar bundan 50 yil avvalga borib taqaladi. Bu yerdagi imkoniyatlarimiz okeandek”, deydi u.
Eslatib oʻtamiz, Oʻzbekistonning bosh konsulligi AQShning Nyu-York shahrida ham mavjud hamda Jamil Sharapov bosh konsul sifatida ishlab kelmoqda.
