Nepalda GES tunnelidan tirik ishchilar topilmoqda

«Trishuli 3A» tunnelidan birinchi boʻlib olib chiqilgan mexanik-brigadir Sanjay Shohning aytishicha, suv toshqini paytida dispetcherlik tunnelida u bilan yana 40-45 kishi boʻlgan. Avariya haqida xabar berilganida u tunnel boʻylab yugurgan va boshqalarni ham ogohlantirib, ularni ham qochishga chaqirgan. Shu tufayli Sanjay vaqt yoʻqotgan va oʻzi tunnel ichkarisida qolib ketgan. Bir necha kun mobaynida u qamalib qolgan boshqa odamlarning ovozlarini eshitib turgan va ular bilan aloqada boʻlib turgan.

GES tunnellarining kirish joylari tosh va loy bilan toʻsilib qolgan. Qutqaruvchilar «Trishuli 3A» tunneliga qadar yetib borishi uchun qariyb olti kun kerak boʻldi. Nepal politsiyasi maʼlumotiga koʻra, tekshirib chiqilgan tunnellarning deyarli barchasi (ikkitasidan tashqari) turli jismlar bilan toʻlib qolgan.

Qutqaruvchilar tunnelning kirish mumkin boʻlgan qismi hamda mashina zalini tekshirib koʻrishgan, biroq boshqa ovozlar eshitilmagan va faqat bir kishining jasadini topishgan. Nepal armiyasi vakillari GES hududida qidiruv-qutqaruv operatsiyasi davom etayotganini maʼlum qilgan.

Fojiadan oʻn kun oʻtganida yana ikki kishi tirik holda topildi. Ulardan biri, Xitoy fuqarosi boʻlgan ishchini nepallik va janubiy koreyalik qutqaruvchilar tunnel ichkarisida, kirish joyidan 255 metr masofada aniqlashgan.

Shuningdek, oʻz vayron boʻlgan uyida 10 kun davomida qolib ketgan yana bir ayol ham qutqaruvchilar tomonidan olib chiqilgan. Shu tariqa, soʻnggi kunlarda qutqarib olingan kishilar soni 4 nafarni tashkil etmoqda. 

«Rasvuagadi» GESida ham qutqaruv operatsiyasi davom etmoqda. Nepal rasmiylariga koʻra, stansiyaning yer osti binosida qamalib qolgan 40 dan ortiq ishchi hali ham tirik.