Prezident administratsiyasi rahbari Saida Mirziyoyeva Toshkent shahrida Zamonaviy sanʼat markazi ochilishida ishtirok etdi.
“Toshkentda Zamonaviy sanʼat markazining (“CCA Tashkent”) ochilish marosimi boʻldi. Ushbu dargohda koʻrgazma zallari, kutubxona, konsept-stor, taʼlim maydonlari hamda uchrashuv va tadqiqotlar uchun moʻljallangan jamoat hududlari oʻrin olgan. Qamrovining bu qadar kengligi uni butun Markaziy Osiyo mintaqasida shu turdagi birinchi raqamli majmua darajasiga olib chiqmoqda”, deb yozdi u oʻz telegram-kanalida.
Yangi madaniy klaster 1912-yilda qad rostlagan sobiq dizel elektr stansiyasining tarixiy binosida joylashgan boʻlib, inshootning meʼmoriy transformatsiyasi dunyoga mashhur “Studio KO” byurosi tomonidan amalga oshirilgan. Bu yerda koʻrgazmalar, ilmiy izlanish jarayonlari, maʼruzalar, ochiq muloqotlar, film namoyishlari, konsert va performanslar muntazam oʻtkazib boriladi.
“Mamlakatimizda yana bir shunday nufuzli, zamonaviy maydonning vujudga kelgani alohida ahamiyatga ega. “CCA Tashkent” ijodkorlar, kuratorlar va xalqaro tashkilotlar bilan yaqindan hamkorlik oʻrnatib, oʻzbekistonlik isteʼdod egalarining yangi auditoriyaga chiqishi hamda xorijiy sahnalarda munosib eʼtirof topishiga zamin yaratadi.
Mazkur loyiha Prezidentimizning tashabbuslari hamda Oʻzbekiston Madaniyat va sanʼatni rivojlantirish jamgʻarmasining katta saʼy-harakatlari natijasida roʻyobga chiqdi”, deya fikr bildirgan Saida Mirziyoyeva.
