Fransiya prezidenti Emmanuel Makron bepul platformalar va generativ sunʼiy intellektning (SI) kinematografiya uchun tahdidi haqida soʻzlar ekan, agar SI ijodkorlarning oʻrnini egallashga daʼvo qilsa, bu ulkan xato boʻlishini aytdi. U janubiy koreyalik hamkasbi Li Chje Myon bilan birgalikda «Lyumer sammiti» ochilishida soʻzga chiqdi.
«Agar hisoblash qudrati ijodiy qudratga aylanishi mumkinligiga ishonsak, dahshatli xatoga yoʻl qoʻygan boʻlamiz. U ijod sanalgan narsaga taqlid qilishi mumkin. Lekin u hech qachon inson ijodining mutlaq oʻziga xosligini oʻrnini bosa olmaydi. Unda faqat buning koʻrinishi bor, xolos», – dedi Makron.
Fransiya prezidentining taʼkidlashicha, sunʼiy intellekt «bizga xos boʻlgan hissiyotni maʼlum maʼnoda taqlid qiladi, xolos». U «ushbu sunʼiy intellektni ijodkorlik xizmatiga qoʻyish» vazifasini zamonamizning yana bir chaqirigʻi deb atadi va SI texnologiyalari ustidan «nazoratni qaytarishga» daʼvat etdi, biroq aniq chora-tadbirlarni taklif qilmadi.
«Biz sunʼiy intellekt yanada masʼuliyatli va inson manfaatlariga koʻproq urgʻu bergan holda rivojlanadigan davrni boshlashimiz kerak», – deb taʼkidladi oʻz navbatida Li Chje Myon.
Fevral oyida Makron videooʻyinlar va sunʼiy intellekt sababli yoshlarning ruhiy salomatligiga oid xavflarni oʻrganishni taklif qilgan va cheklovlar boʻlishi mumkinligini istisno etmagan edi. Prezident soʻzlariga koʻra, chat-botlar inson xulq-atvori va hamdardligiga taqlid qiladi, «doʻstlardek muloqot qiladi» va bu «salbiy oqibatlarga olib kelishi» hamda yoshlarning «yakkalanib qolishini» kuchaytirishi mumkin.
Shuningdek, Fransiya yetakchisi sunʼiy intellekt yordamida yaratilgan kontentni «SI tomonidan yaratilgan» degan majburiy belgi bilan tamgʻalashni taklif qilgan. «Buni amalga oshirishga imkon beradigan Yevropa meyoriy hujjatlari bizda bor. Men Yevrokomissiyadan bu talabni qatʼiy soʻrayman va undan chekinmayman», – deb taʼkidlagan edi u oʻshanda.
