Toshkent viloyati sudi fuqarolik ishlari boʻyicha sudlov hayʼati apellyatsiya instansiyasi mahalla fuqarolar yigʻini va fuqarolar zimmasiga 1 758 tup daraxtni boshqa joyga koʻchirish majburiyatini yuklash haqida ajrim chiqardi. Kun.uz sud hujjati bilan tanishdi.
Ajrimda keltirilishicha, Toshkent tumani Qizgʻaldoq mahallasi Qizgʻaldoq koʻchasida yashovchi aholi 2023-yilda hududdan oʻtgan yuqori kuchlanishli elektr tarmogʻi muhofaza zonasidagi yer maydonini obodonlashtirgan. Ular bu ishni “Oʻzbekiston milliy elektr tarmoqlari” AJning yozma ruxsatini olgan holda amalga oshirishgan.
Fuqarolar ushbu yer maydoniga jami 1758 tup (633 tupi manzarali, 1125 tupi mevali) daraxt koʻchatlarini oʻtqazishgan. Ushbu hudud hozirda yashil zonaga aylangan. Daraxtlar belgilangan tartibda dalolatnoma tuzilib, “Qizgʻaldoq” MFYga biriktirilgan.
2025-yilga kelib, ushbu 2,5 ga yer maydonining egasi chiqqan: u 2021-yilda tuman hokimi qarori bilan MChJga doimiy foydalanish huquqi asosida berilgani maʼlum boʻlgan.
Muhim jihat: Toshkent tumani hokimining 2021-yildagi qarorida MChJga “Bogʻizilol” MFY hududidan yer maydoni ajratib berish nazarda tutilgan. Tuman hokimining 2026-yil 22-yanvardagi qarori bilan dastlabki qarordagi “Bogʻizilol MFY” soʻzlari “Qizgʻaldoq MFY” soʻzlariga oʻzgartirilgan.
MCHJ sudga daʼvo arizasi kiritib, yer maydonida koʻkalamzorlashtirish hamda manzaralari daraxt koʻchatlari yetishtirish faoliyatini amalga oshirish uchun javobgar tomon qarshilik qilayotganini bildirgan. Daʼvo arizasida javobgar fuqarolarga 1758 tup daraxtni mahalliy hokimlik koʻrsatgan boshqa hududga koʻchirish majburiyatini yuklash soʻralgan.
FIB Zangiota tumanlararo sudining 2026-yil 26-fevraldagi hal qiluv qarori bilan daʼvo talabini qanoatlantirish rad etilgan. Zangiota tumani prokurori v.v.b. X.Ubaydullayev apellyatsiya protesti kiritib, hal qiluv qarorini bekor qilishni hamda daʼvo talabini qanoatlantirish haqida yangi hal qiluv qarori qabul qilishni soʻragan.
Shu tariqa, Toshkent viloyati sudi fuqarolik ishlari boʻyicha sudlov hayʼati apellyatsiya instansiyasining 2026-yil 10-iyuldagi ajrim bilan dastlabki sud qarorini bekor qilgan va yangi qaror qabul qilgan.
Unga koʻra, sud daʼvogar tomonning javobgar fuqarolarga 1758 tup daraxtni koʻchirish majburiyatini yuklash haqidagi daʼvo talabini qanoatlantirgan. Ajrim bilan “javobgar” MFY zimmasiga daraxtlarni koʻchirish majburiyatini yuklagan. Daraxtlarni koʻchirish bilan bogʻliq xarajatlar daʼvogar zimmasiga yuklanishi belgilangan.
