Toshkent viloyati Toshkent tumani Beshterak mahallasidagi 6 gektar hududda kottejlar qurilishi kerak edi. Yangi hovliga ega bo‘lish umidida yuzlab fuqarolar shartnoma qilib, to‘lovlarni amalga oshirgan.
Ammo quruvchi firma egalarining jinoiy qilmishlari sabab barcha ishlar orqaga ketgan va «Oltin makon»da qurilish ishlari chala qolgan.
Har doimgidek oddiy odamlar orzu-umidlari o‘rnini to‘xtab qolgan qurilish, imzo chekilgan shartnoma va javobsiz savollar egallab olgan.
Gap shundaki, Toshkent tumanining Beshterak mahallasida «Oltin makon» zamonaviy kottej shaharchasi sifatida reklama qilindi. Xaridorlarga 171 ta ikki qavatli, 178 kvadrat metrlik hovli uylari taklif etildi.
Eng jozibali tomoni – 24 oygacha foizsiz bo‘lib to‘lash imkoniyati ham borligi edi. Shart oddiy: xaridor kamida 50 foiz to‘lovni amalga oshiradi, qolgani muddatli to‘lovda. Har bir fuqaro bilan ikki tomonlama shartnoma tuzildi va hamma narsa qonuniy ko‘rinardi.
Biroq oradan vaqt o‘tib, barchasi reklamadagidek ajoyib tarzda yakunlanmadi. Qurilish ishlari to‘xtab qoldi, ko‘plab kottejlar o‘z vaqtida egalariga topshirilmadi.
Jabrlanuvchilardan biri Baxtiyor Rahimxo‘jayevning aytishicha, shartnomalar 2023 yil 1 iyundan boshlab tuzilib, qurilish ishlari boshlangan va kottejlar 2025 yil mart oyida foydalanishga topshirilishi va’da qilingan. Biroq 2025 yil boshida qurilish ishlari hech qanday tushuntirishsiz to‘xtatilgan.
«Biz mas’ullarga chiqishga, qo‘ng‘iroq qilib vaziyatni aniqlashga harakat qildik, ammo hech qanday javob olmadik. Shundan keyin fuqarolar o‘zimiz birlashib, qurilishni davom ettirishga qaror qildik va ishlarni ham boshladik. Lekin bu safar ham yangi ta’sischi tomonidan qurilish ishlarini to‘xtatish haqida buyruq berildi. Hozir biz kutayotgan narsa adolatli yechim. Sudda 31 nafar fuqaroga uylarni natura shaklida berish yoki fuqarolik sudiga murojaat etish tavsiya qilindi. Shu bilan birga, bu yerdagi yer maydonini auksionga chiqarish masalasi ham ko‘rilmoqda. Bizning asosiy talabimiz – auksionni to‘xtatish. Chunki yer sotilib ketsa, qolgan hududlar ham auksionga chiqarilishi mumkin. Natijada odamlar nafaqat to‘lagan pullaridan, balki o‘z mablag‘i hisobidan qurib bitkazgan uylaridan ham ayrilib qolishi mumkin», - deydi jabrlanuvchi.
Kutishdan charchagan ba’zi xaridorlar oxir-oqibat uylarini o‘z mablag‘i va o‘z kuchi bilan qurib bitirishga majbur bo‘lgan, aslida ular allaqachon quruvchiga to‘lagan pul evaziga bajarilishi kerak bo‘lgan ishlarni yana bir bor o‘z cho‘ntagidan moliyalashtirgan. Bugungi kunda qo‘lida shartnoma, to‘lov kvitansiyalari bo‘lgan yuzlab oilalar hamon o‘z uyiga to‘liq egalik qila olmayapti, na ko‘chib kirish huquqi, na mulk hujjatlari to‘liq rasmiylashtirilgan.
