Qarsaklar bilan yakunlangan sud: Yakkasaroydagi yashil hudud va futbol maydonchasi saqlab qolindi

Yakkasaroydagi yashil hudud bo‘yicha aholi sudda g‘alaba qildi. Oliy sud Toshkent shahar qurilish bosh boshqarmasining qurilishga ruxsat berilgan xulosasini bekor qildi.

Foto: Oliy sud

Sud Toshkentning Yakkasaroy tumanida 3,5 yildan beri davom etayotgan bahsli hudud bo‘yicha aholi foydasiga qaror chiqardi. Bu haqda Oliy sud axborot xizmati xabar berdi.

Ma’lum qilinishicha, tumanning Yunus Rajabiy mahallasidagi yashil hudud bilan bog‘liq ish Oliy sud taftish instansiyasida ko‘rib chiqilgan. Sud qarori bilan Toshkent shahar qurilish bosh boshqarmasining 2023 yil 30 apreldagi D.Yu.ga ijara huquqi asosida tegishli bo‘lgan yer maydoniga savdo va maishiy kompleks, ofis va avtoturargoh qurish mumkinligi haqidagi xulosasi haqiqiy emas deb topilgan.

Shu tariqa Toshkent shahar ma’muriy sudi taftish instansiyasining 2024 yil 6 dekabrdagi qarori o‘zgarishsiz qoldirilgan.

Oliy sud taftish instansiyasining qarori fuqarolar tomonidan qarsaklar bilan olqishlangan.

Kun.uz avvalroq ushbu yashil hudud va bolalar futbol maydonchasi qurilish xavfi ostida qolayotgani haqida surishtiruv e’lon qilgandi. Shundan so‘ng Oliy sud sudyalari mazkur hududda bo‘lib, aholining vajlarini va ishda aniqlangan holatlarni joyida tekshirgan edi.