Toshkent viloyati, Boʻstonliq tumani, «Burchmulla» MFY hududidagi Chorvoq suv ombori suv havzasida choʻkib ketgan 3 kishidan (ota va uning 2 oʻgʻli) birining jasadi topildi. Bu haqda FVV matbuot xizmati xabar bermoqda.
Baxtsiz hodisa 2-sentabr kuni sodir boʻlgandi. Oʻsha kuni besh kishidan iborat oila aʼzolari suv omborida sayr qilish uchun kater ijaraga olgan. Kater haydovchisidan tashqari, unda er-xotin, ularning qizi va ikki oʻgʻli boʻlgan.
Suratga tushish uchun toʻxtagan vaqtda oʻgʻillardan biri choʻmilishga qaror qilgan. U qutqaruv nimchasidan foydalanmagan. Bu vaqtda hududda shamol esayotgan va suvda toʻlqinlar hosil boʻlgandi. Choʻmilish uchun suvga tushgan birinchi oʻgʻilning oyoq tomiri tortishib qolgan. Uning ortidan suvga otasi, soʻng ikkinchi oʻgʻli ham sakragan.
Qayiqchi ham ularni qutqarish uchun suvga tushgan, ammo buning iloji boʻlmagan.
«Xabar kelib tushgan zahoti FVV gʻavvos-qutqaruvchilari hodisa joyiga yetib borib, qidiruv ishlarini boshlagan. Shuningdek, qidiruv ishlari koʻlamining kengligi va suv omborining chuqurligini inobatga olib, hodisa joyida Favqulodda vaziyatlar vaziri topshirigʻiga asosan shtab faoliyati tashkil etilib, qoʻshimcha ravishda Jizzax va Sirdaryo viloyatlari Favqulodda vaziyatlar boshqarmalaridan qoʻshimcha kuchlar jalb etildi. Qidiruv ishlarida barcha zarur texnika va zamonaviy asbob-uskunalardan foydalanilmoqda.
Olib borilgan qidiruv ishlari natijasida bugun soat 13:02 da choʻkib ketgan fuqarolardan birining jasadi topildi», deyiladi FVV matbuot xizmati xabarida.
Qidiruv ishlari davom ettirilmoqda.
