Chorvoq suv omborida choʻkib ketgan uch nafar fuqaroni qidirish boʻyicha qidiruv amaliyoti yakunlandi.
9-sentabr kuni FVV gʻavvoslari kichik oʻgʻilning jasadini topishgandi. 10-sentabr kuni avvaliga katta oʻgʻil, biroz oʻtib otaning ham jasadi suvdan olib chiqilgan.
Baxtsiz hodisa 2-sentabr kuni Toshkent viloyati Boʻstonliq tumanida sodir boʻlgan edi. FVV matbuot xizmati xabariga koʻra, katerda sayr qilish paytida oila aʼzolaridan biri – kichik oʻgʻil qutqaruv nimchasidan foydalanmagan holda choʻmilish uchun suvga tushgan. Uning oyoq tomiri tortishib qolgan va choʻka boshlagan. Unga yordam berish maqsadida akasi va otasi ham birin-ketin suvga tushishgan. Oqibatda uchalasi ham choʻkib ketishgan.
FVV fuqarolarni suv obyektlarida xavfsizlik qoidalariga rioya qilishga chaqirgan.
«Favqulodda vaziyatlar vazirligining tezkor tashkil etilgan shtabi, Jizzax va Sirdaryo viloyatlari Favqulodda vaziyatlar boshqarmalarining qoʻshimcha kuch va vositalarini jalb qilish, shuningdek, eng yangi zamonaviy qidiruv uskunalarini ishga solish orqali qidiruv ishlari samaradorligiga erishildi. Suv omborining hajmi kattaligi hamda uning chuqurligiga qaramay, choʻkib ketganlarni qidirish ishlari nisbatan qisqa vaqt ichida yakunlandi. Fursatdan foydalanib, yurtdoshlarimizni suv obyektlarida xavfsizlik qoidalariga rioya qilishga chaqiramiz», – deyiladi xabarda.
