Xiaomi Xitoyda gibrid model - yetti oʻrinli Skynomad N90 Max sotuvini yoʻlga qoʻydi, deb xabar berdi CarNewsChina.
Model ketma-ket gibrid (EREV) turiga mansub: benzinli dvigatel faqat generator vazifasini bajaradi, harakatlanishni esa elektromotorlar taʼminlaydi.
N90 Max - katta 7 oʻrinli krossover boʻlib, uzunligi 5285 mm, gʻildirak bazasi esa 3080 mm ni tashkil etadi. Aerodinamik qarshilik koeffitsiyenti 0,255 ga teng, bu katta krossover uchun past koʻrsatkich hisoblanadi. Old qismida xochsimon bezakli va 624 metr masofaga yorituvchi «Ninachi» faralari oʻrnatilgan.
Kapotda chuqurligi 750 mm gacha boʻlgan suv toʻsiqlaridan oʻtish imkonini beruvchi havo yigʻgich koʻzga tashlanadi, hatto avtomobilning suvda muallaq tura olish qobiliyatiga egaligi ham aytilgan.
Salon bezagi uchun uch xil variant taklif etiladi: keramik-qaymoq, qora va mokko-jigarrang. Oʻrindiqlar joylashuvi - 2+2+3, transformatsiyaning 11 ta varianti va 1831 litr yukxona hajmi mavjud.
Oldingi va ikkinchi qatordagi oʻrindiqlar vaznsizlik holati, massaj, ventilyatsiya va isitish rejimlariga ega boʻldi. Markaziy orolcha harakatlanuvchan boʻlib, yoʻnaltirgichlarga oʻrnatilgan va ichiga 9 litrli muzlatkich joylashtirilgan. Multimedia tizimi HyperOS boshqaruvidagi Qualcomm 8650 chipiga asoslangan 16,1 dyuymli ekrandan iborat.
Dvigatel 1,5 litrli turbomotor-generator va ikkita elektromotorni oʻz ichiga oladi - ularning umumiy quvvati 421 ot kuchini tashkil etadi. Faqat elektr quvvatidagi yurish masofasi - 464 km (CLTC), umumiy yurish masofasi esa - 1705 km.
Xavfsizlikka kelsak, krossover 12 ta xavfsizlik yostiqchasi hamda Nvidia Thor (700 TOPS) chipi va Xiaomi HAD XLA kognitiv modelidagi avtopilot bilan jihozlangan. Shuningdek, katta yoʻl va shahar ichida harakatlanish uchun navigatsiya yordamchisi hamda avtomatik parkovka funksiyalari qoʻllab-quvvatlanadi.
