Prezident Shavkat Mirziyoyev 9-sentabr kuni «Aholini shovqinning zararli taʼsiridan himoya qilish toʻgʻrisida»gi qonunni imzoladi. Bu haqda Adliya vazirligi xabar berdi.
Qonunga koʻra, fuqarolarning osoyishtaligi va normal dam olishini buzadigan, shovqinning yoʻl qoʻyiladigan darajasidan yuqori boʻlgan tovushlarga cheklov belgilanadi. Bunday shovqinlarga turar joylarda maishiy faoliyat, qurilish maydonlaridagi ishlar, qurilish texnikasi va transport vositalari, shuningdek turli transportlarning harakati natijasida yuzaga keladigan shovqinlar kiradi.
Belgilangan tartibga koʻra, ish kunlari soat 23:00 dan 07:00 gacha, dam olish va ishlanmaydigan bayram kunlari esa 22:00 dan 09:00 gacha shovqinning yoʻl qoʻyiladigan darajasidan ortiq tovush chiqarib, fuqarolar osoyishtaligini buzishga yoʻl qoʻyilmaydi.
Shuningdek, shovqinning yoʻl qoʻyiladigan darajasi odamni sezilarli darajada bezovta qilmaydigan va inson organizmining funksional tizimlari hamda shovqinga sezgir aʼzolarida jiddiy oʻzgarishlarga olib kelmaydigan daraja sifatida belgilangan. Uning aniq mezonlari sanitariya qoidalari va normalari asosida belgilanadi.
Aholini shovqinning zararli taʼsiridan himoya qilish sohasidagi vakolatli davlat organi etib Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi belgilandi.
Shovqinning zararli taʼsiri oqibatida yetkazilgan zarar uchun sud tartibida kompensatsiya undirilishi mumkin. Qonun rasmiy eʼlon qilingan kundan boshlab uch oy oʻtgach kuchga kiradi.
Maʼlumot uchun, Oʻzbekiston qonunchiligida tungi vaqtda maishiy shovqin chiqarganlik uchun javobgarlik belgilangan.
Tungi vaqtda fuqarolar tinchini buzish, yaʼni baland ovoz bilan qoʻshiq aytish, musiqa chalish, tovush signallari berish, xonadonlarda, turar joylarning yoʻlaklari va eshiklarida, koʻchalarda ovozi baland qilib qoʻyilgan televizorlar, radiopriyomniklardan foydalanish mumkin emas.
Shuningdek, magnitofonlar va ovoz chiqaruvchi boshqa apparaturalardan foydalanish, turar joy binolarida va ulardan tashqarida juda zarur boʻlmagani holda shovqin chiqaruvchi ishlar qilish hamda maishiy shovqinga qarshi kurash talablarini buzish maʼmuriy javobgarlikka sabab boʻladi.
Yuqorida keltirib oʻtirgan holatlarni sodir etganlik uchun fuqarolarga BHMning uchdan bir qismi (146 ming soʻm), mansabdor shaxslarga esa uchdan bir qismidan ikkidan bir qismigacha (146-220 ming soʻm) miqdorda jarima solinishi mumkin.
