Prezident Shavkat Mirziyoyev 10-sentabr kuni chiqindilarni boshqarish tizimini takomillashtirish, ularni qayta ishlash va elektr energiyasi ishlab chiqarish boʻyicha investitsiya loyihalari taqdimoti bilan tanishdi.
2026–2027-yillarda chiqindilarni yoqish orqali elektr energiyasi ishlab chiqarish boʻyicha Xitoy kompaniyalari bilan hamkorlikda oltita investitsiya loyihasini amalga oshirish belgilangan. Ularning umumiy qiymati 933 million dollarni tashkil etadi.
Loyihalar Qashqadaryo, Samarqand, Toshkent, Andijon, Fargʻona va Namangan viloyatlarida amalga oshirilmoqda.
1-sentabr holatiga koʻra, loyihalar doirasida 286,8 million dollar investitsiya oʻzlashtirilgan. Mahalliy mahsulot va xizmatlar xaridi 76,6 million dollarga yetgan, qurilish ishlariga esa 2 ming nafar mahalliy ishchi jalb qilingan.
Qashqadaryo va Samarqanddagi zavodlarni 2026-yilda, qolgan toʻrt hududdagi quvvatlarni esa 2027-yilda ishga tushirish rejalashtirilgan.
Oltita korxona toʻliq quvvatda ishlay boshlagach, yiliga 3,6 million tonna qattiq maishiy chiqindi qayta ishlanib, 1,6 milliard kVt·soat elektr energiyasi ishlab chiqariladi. Bu poligonlarga tushadigan yuklamani kamaytirish va “nol chiqindi” tamoyiliga bosqichma-bosqich oʻtishga xizmat qilishi kutilmoqda.
Taqdimotda Singapur, Janubiy Koreya va Xitoy kompaniyalari ishtirokida yana beshta istiqbolli loyiha ham koʻrib chiqildi. Ularning umumiy qiymati 625 million dollar boʻlib, Qoraqalpogʻiston, Jizzax, Surxondaryo, Buxoro va Xorazmda amalga oshirilishi nazarda tutilgan.
Ushbu beshta loyiha amalga oshirilsa, yiliga yana 1,9 million tonna maishiy chiqindi qayta ishlanib, 635 million kVt·soat elektr energiyasi ishlab chiqariladi. Shuningdek, 500 ta yangi ish oʻrni yaratilishi, 158 million kub metr tabiiy gaz tejalishi va issiqxona gazlari chiqindilari 316 ming tonnaga kamayishi kutilmoqda.
Prezident loyihalarni jadallashtirish, investorlar uchun zarur infratuzilma va tashkiliy sharoitlar yaratish, mahalliylashtirish darajasini oshirish hamda kadrlar tayyorlashga eʼtibor qaratish boʻyicha topshiriqlar berdi.
Shuningdek, Green University, Samarqand davlat universiteti va Qarshi davlat universiteti bilan hamkorlikda chiqindi yoqish zavodlari uchun 1 ming nafar mutaxassisdan iborat kadrlar zaxirasini shakllantirish vazifasi belgilandi.
