AQSH prezidenti Donald Tramp agar noyabr oyida boʻlib oʻtadigan oraliq saylovlarda respublikachilar Vakillar palatasi va Senat ustidan nazoratni saqlab qoladigan boʻlsa, AQShning har bir voyaga yetgan fuqarosiga 5 ming dollardan toʻlashga vaʼda berdi.
«Agar respublikachilar Vakillar palatasi va AQSH Senatini saqlab qolsa, bizning aql bovar qilmaydigan iqtisodiy muvaffaqiyatimiz tufayli... men Amerika Qoʻshma Shtatlarining har bir voyaga yetgan fuqarosiga 5 ming dollar miqdorida dividend toʻlayman», – degan prezident Respublikachilar partiyasining Texas shtati Dallas shahrida oʻtgan qurultoyida.
U buni «muvaffaqiyatli kompaniyalarning investorlarga dividend toʻlashi»ga oʻxshatgan.
«Yagona cheklov shundaki, dividendlar AQShda sarflanishi kerak. Biz pullarni Kanadaga borib sarflashingizni xohlamaymiz. Biz sizning Xitoyga, Germaniyaga borishingizni istamaymiz... Siz pullarni AQShda sarflashingiz kerak», – deya qoʻshimcha qildi Tramp.
Qayd etish kerakki, bu tarixda AQSH prezidenti saylovchilar ovozini jalb qilish kampaniyasi doirasida amerikaliklarga bunday toʻlovlar vaʼda qilayotgan birinchi holatdir.
Bundan tashqari, bu mablagʻlarni aynan kim yoʻnaltirishi, Amerika hukumati ularning qanday sarflanishini qay tarzda nazorat qilishi va umuman, bunday toʻlovlar qanchalik qonuniy ekani ham nomaʼlumligicha qolmoqda.
Tramp koʻpincha mitinglar paytida eʼtiborni jalb qilish uchun juda gʻayrioddiy gʻoyalarni ilgari surishi maʼlum.
2025-yilda AQShning balogʻatga yetgan aholisi soni 267 mln kishi atrofida boʻlgan. Bu shuni anglatadiki, ularning barchasiga «Trampning 5 ming dollarlik dividendlari»ni toʻlash uchun jami 1,34 trln dollar kerak boʻladi (lekin Amerika aholisining barchasi ham Amerika fuqarolari emas).
Hozirda Demokratik partiya aksar soʻrovlarda yetakchilik qilmoqda va Vakillar palatasi va hatto Senatni nazorat qilish uchun yaxshi imkoniyatga ega.
Tramp AQSH tarixida prezident partiyasi oraliq saylovlarda magʻlub boʻlishi koʻp uchraganini eslagan. «Biz buni oʻzgartirishimiz kerak», – degan u va amerikaliklarni «byulletenda Tramp ismi koʻrsatilgandek» ovoz berishga chaqirgan.
Texasdagi chiqishi chogʻida Tramp noyabr oyida Respublikachilar partiyasi magʻlubiyatga uchrashi – amerikaliklar «chegaralarni yoʻqotishi, soliqlar kamayishidan mahrum boʻlishi va xavfsizligini boy berishi»ni anglatishini aytgan. «Sizni yana ikki yil avvalgidek dahshatli doʻzax kutadi», – deya qoʻshimcha qiladi AQSH prezidenti. U AQSH «butun dunyo uchun masxara boʻlgani», ammo hozir hech kim uning ustidan kulmayotganini taʼkidlagan.
