Yaroqlilik muddati - mahsulot xavfsizligining yagona kafolati emas
Mutaxassisning tushuntirishicha, mahsulotning yaroqlilik muddati oʻtmagan boʻlishi uning har qanday sharoitda xavfsizligini anglatmaydi. Bunda mahsulot qanday harorat va namlik sharoitida saqlangani, qanday tashilgani hamda qadoqning butunligi muhim ahamiyatga ega.
«Aynan shokolad mahsulotlari uchun belgilangan standart harorat 20 darajadan yuqori boʻlmasligi, nisbiy namlik esa 75–80 foiz boʻlishi kerak. Agar shu belgilangan talablarga rioya qilinmasa, hatto mahsulotning germetikligi buzilmagan taqdirda ham uning tashqi koʻrinishi oʻzgarishi mumkin. Ayniqsa, yoz oylarida yuqori harorat mahsulotning tez buzilishiga sabab boʻlishi mumkin», - deydi Oziq-ovqat mahsulotlari xavfsizligi qoʻmitasi Mahsulotlar xavfsizligini nazorat qilish boshqarmasining bosh mutaxassisi.
Qurt mahsulotga qayerdan tushadi?
Mahsulotning ishlab chiqaruvchidan isteʼmolchigacha boʻlgan yoʻli bir necha bosqichdan iborat: ishlab chiqarish, qadoqlash, tashish, omborlarda saqlash va savdo. Ushbu bosqichlarning birortasida sanitariya qoidalari yoki saqlash talablari buzilishi mahsulot xavfsizligiga taʼsir qilishi mumkin.
Mutaxassisning taʼkidlashicha, mahsulot qadoqlangandan keyin ham uning xavfsizligiga tashqi omillar taʼsir qilishi mumkin. Masalan, tashish vaqtida qadoq shikastlanib, unga havo kirishi yoki mahsulot notoʻgʻri haroratda saqlanishi ehtimoli mavjud.
«Isteʼmolga yaroqlilik muddati hali tugamagan boʻlsa ham, mahsulot notoʻgʻri saqlansa, notoʻgʻri tashilsa yoki qadogʻi buzilsa, uning xavfsizligi buzilishi mumkin. Tashqi taʼsirlar oqibatida ikkilamchi ifloslanish yuzaga kelgan mahsulotni isteʼmol qilish tavsiya etilmaydi».
