Rossiya va Ukraina AQSH prezidenti Donald Tramp mamlakatlar oʻrtasida «energetika sulhi» eʼlon qilinganidan bir necha soat oʻtgach, bir-biriga zarba berishni davom ettirdi.
15-sentabrga oʻtar kechasi Ukraina qurolli kuchlari «Rosneft»ning Samara oblastidagi Sizran neftni qayta ishlash zavodiga zarba berdi, korxonada yongʻin chiqqan. Tunda region uzra jami 40 dan ortiq dron urib tushirilgan. Taganrogda Ozon omborlari, mahalliy qishloq xoʻjaligi korxonasi, oʻquv binosi, doʻkon va bir necha turar joylar shikastlangan. Astra maʼlumotiga koʻra, «Taganrog-Sentralniy» harbiy aerodromi ham zarbaga uchragan. Taganrogda ham, Samara oblastida ham jabrlanganlar toʻgʻrisida xabar berilmagan.
Oʻz navbatida, tongda Rossiya dronlari Kiyevga hujum qildi. Sakkiz kishi jarohat olgan, zarba oqibatida shaharning Darnitskiy va Goloseyevskiy rayonlaridagi avtomobillarga yonilgʻi quyish shoxobchalari yonib ketgan. Shuningdek, Kiyevning turli qismlaridagi ombor va bir necha noturar joylar zarbaga uchragan. Zaporijjyada infratuzilma obyektiga zarba oqibatida bir kishi halok boʻlib, toʻrt kishi jarohat olgan.
«Rossiya energetika, oddiy logistika va muhim infratuzilmalarimiz boʻylab zarba berishni toʻxtatmayapti. Bunga javobimiz – sezilarli boʻladi», – deya yozdi tongda Ukraina prezidenti Volodimir Zelenskiy.
Navbatdagi hujumlardan bir necha soat oldinroq AQSH prezidenti Truth Social ijtimoiy tarmogʻida Moskva va Kiyev energetika obyektlari boʻylab zarbalarni toʻxtatishga kelishib olganini aytgan, dizel narxi oshib ketishining asosiy sababi AQShning Eron bilan urushi emas, balki Rossiyaning Ukrainaga qarshi urushi ekanini qoʻshimcha qilgandi.
Financial Times nashri u bunday bayonot berishda shoshilganini qayd etdi. Energetik sulh gʻoyasi haqiqatan ham muhokama qilingan: dastlab AQSH, Rossiya va Ukrainaning uch tomonlama uchrashuvlarida, fevral oyidagi muzokaralar toʻxtab qolishidan keyin esa alohida muzokaralarda va yopiq kanallar orqali. Biroq, gazeta suhbatdoshlari taʼkidlashicha, Putin qish arafasida bunday kelishuv tuzishni istamaydi. Moskvadagilar sovuq mavsumda Ukraina energetikasiga berilgan zarbalar Kiyevga bosimni kuchaytiradi va uni yon berishga majbur qiladi, deb hisoblaydi.
Ukrainalik ikki yuqori martabali mulozim FT bilan suhbatda Trampning bayonotini saylovchilarga hukumat yoqilgʻi narxini pasaytirish ustida ishlayotganini koʻrsatish istagi bilan izohlagan. Bu Tramp qimmat dizel uchun javobgarlikni Ukrainaga yuklashi bilan bogʻliq ilk holat emas. 13-sentabr kuni u Zelenskiyni Rossiyadagi dizel ishlab chiqaruvchi neftni qayta ishlash zavodlariga zarba berishni toʻxtatishga chaqirib, bunday zarbalar «butun dunyoga zarar yetkazayotgani»ni aytgandi.
