Yigʻilishda Qoraqalpogʻistonda 4 mln 300 ming gektar yaylov yeri borligi, shundan 2,5 mln gektaridan aholi daromadini oshirish va chorvani koʻpaytirish uchun yetarlicha foydalanilmayotgani qayd etildi.
“Beruniy Agrostar” Qoʻngʻirot, Beruniy va Chimboyda aylanmadan chiqqan 2 ming gektar yerni tiklab, ozuqa yetishtirishga moslashtirmoqda. Kelasi yili yana 5 ming gektar oʻzlashtiriladi. Bu 14 ming bosh qoramol uchun ozuqa bazasi boʻladi.
Boʻzatovda ham 7,5 ming gektar yerni ozuqaga moslashtirishga 100 mlrd soʻm ajratiladi. Ozuqa yetishtirishga har gektar uchun 500 ming soʻm subsidiya berish boʻyicha oʻn kunda qaror kiritish topshirildi.
Misr tajribasini oʻrganish uchun 200 nafardan ziyod fermer, jumladan, qoraqalpogʻistonlik 26 nafar fermer ushbu davlatga yuborilgan. Dastlabki bosqichda Qoraqalpogʻistonning 20 ming gektar maydonida Misr tajribasi yoʻlga qoʻyiladi.
Choʻl hududlarida ozuqa yetishtirishni koʻpaytirish uchun Misrdan mutaxassislar va texnologiyalar jalb etiladi. Chorvachilik uchun Osiyo taraqqiyot bankidan olinayotgan 60 mln dollar kredit va 8 mln dollar grant birinchi navbatda shu loyihaga yoʻnaltiriladi.
Yigʻilishda Qoraqalpogʻistondagi 417 ming gektar ekin yerini sugʻorishga 5 mlrd 700 mln kub metr suv sarflanayotgani taʼkidlandi. Yoʻqotishlar 38 foizni – 2 mlrd 100 mln kub metrni tashkil etmoqda.
Toʻrtkoʻldagi “Yonbosh” kanalidan yiliga oʻtadigan 115 mln kub metr suvning 44 millioni yoʻqotiladi. Kanal toʻliq betonlansa, yana 9 ming gektarga suv yetkazish va 15 ming bosh qoramol uchun ozuqa bazasini yaratish mumkinligi qayd etildi.
Boʻzatovdagi “Erkindaryo” kanalining 8 kilometrini betonlash hisobiga foydalaniladigan yer 3 ming gektarga koʻpayadi, 15 ming gektarda suv taʼminoti yaxshilanadi. 3 ta suv inshooti va 22 ta artezian quduq barpo etilishi yana 5 ming gektar ozuqa maydonini yaratish imkonini beradi.
Ushbu ishlarga jami 135 milliard soʻm ajratish, ikki kanalni 1-martgacha betonlash topshirildi. Toʻrtkoʻl va Boʻzatovda kelasi yil 17 ming gektarda ozuqa ekib, 2 ming odamni daromadli qilish vazifasi belgilandi.
