19-sentabr kuni Yaponiyaning Nagoya shahrida XX yozgi Osiyo oʻyinlari rasman ochildi. Keyingi 16 kun davomida, yaʼni 4-oktabrga qadar 11 mingga yaqin sportchi 43 ta sport turi boʻyicha 469 ta medal jamlanmasi uchun kurash olib boradi. Yaponiya uchun bu Tokio (1958) va Xirosimadan (1994) keyin uchinchi Osiyo oʻyinlaridir. Mamlakat uni oxirgi marta qabul qilganiga 32 yil boʻldi.
Ochilish marosimi
Marosim Mizuho Park (Paloma Mizuho) stadionida boʻlib oʻtdi va taxminan ikki soat davom etdi. Reuters agentligining yozishicha, dastlabki daqiqalar vazmin kechgan, keyin esa shou yorugʻlik, musiqa va raqs bayramiga aylandi. Besh yil oldin Tokio Olimpiadasi pandemiya tufayli boʻsh tribunalarda oʻtkazilgan boʻlsa, endi stadion tomoshabinlar bilan toʻldi.
Oʻyinlarni imperator Naruxito ochiq deb eʼlon qildi. U XOQ prezidenti Kirsti Koventri bilan birga 45 ta mamlakat va mintaqa paradini tomosha qildi.
Tomosha mavzusi «Heartbeat» («Yurak urishi») deb nomlandi. Qizil va oq kostyum kiygan artistlar «Welcome» (Xush kelibsiz) soʻzini hosil qilishdi, skripkachi Taro Xakase esa jonli ijro etdi.
Kulminatsion nuqta mashʼalani yoqish boʻldi: uning oldiga zinapoyadan Osiyo oʻyinlarining besh karra gʻolibi, sobiq bosqon uloqtiruvchi Sigenobu Murofusi va uning oʻgʻli, 2004-yilgi Olimpiya chempioni Koji koʻtarildi. Bungacha olov estafetasi Aichi prefekturasining 40 ta munitsipaliteti va Nagoyaning 16 ta tumanidan oʻtgan edi.
Osiyo oʻyinlariga tayyorgarlik qiyin oʻtdi
Tayyorgarlik tanqidlarsiz oʻtmadi. Alohida olimpiya qishlogʻi oʻrniga sportchilar mehmonxonalarga, vaqtinchalik yogʻoch konteynerlarga va koʻrfazdagi kruiz kemasiga joylashtirildi. Tashkilotchilar buni tejamkorlik bilan izohladi. Delegatsiyalar, jumladan, Yaponiya delegatsiyasi ham chalkashliklar va ikki marta bron qilish holatlaridan shikoyat qildi. Janubiy Koreya terma jamoasi Garden Pier portidagi konteynerlarni basketbolchilar uchun juda tor deb atadi. Alohida noxushlik 8-sentabr kuni sodir boʻldi: rekord darajadagi jala shaharning bir qismini suv ostida qoldirdi va bir necha yuz sportchi vaqtinchalik binolardan evakuatsiya qilindi. Maʼlumotlarga koʻra, jiddiy talofatlar boʻlmagan.
