«Siti» yakkapeshqadamga aylandi, «Real» derbida yutqazdi. Kun oʻyinlari
|11:084 70211 min
Abduqodir Husanov tushmagan oʻyinda «Manchester Siti» «Sanderlend»ga 5 ta gol urdi, ammo 3 ta oʻtkazib yubordi. «Shaharliklar» bu gʻalabadan keyin xalqaro tanaffusga turnir jadvali peshqadami sifatida yoʻl oldi. Madrid derbisi esa hakamlik mojarosiga aylandi. Yakshanba oqshomida roʻy bergan asosiy voqealar, oʻyinlardagi gollar va turnir jadvalidagi vaziyat.
Foto: Global Look PressFoto: Global Look Press
Angliya: Holand geshtaltni yopdi, «MU» yana ochko yoʻqotdi
Enso Mareska APLda qatorasiga ikkinchi oʻyinda Abduqodir Husanovni zaxira oʻrindigʻida qoldirdi (oʻzbekistonlik hujumchi hafta oʻrtasida Liga kubogida «Norvich»ga qarshi oʻyinda boshlangʻich tarkibda tushgandi), u ishonch bildirgan himoya chizigʻi esa uchta gol oʻtkazib yubordi.
Oʻyin Enso Fernandesning «Manchester Siti» safidagi ilk goli bilan boshlandi. Argentinalik yarimhimoyachining oʻrnida aksar futbolchilar jarima zarbasidan klassik tarzda toʻpni sheriklariga yetkazib bergan boʻlardi, u esa toʻpni jonli devorni aylanib oʻtgan holda darvozabonning yaqin burchagiga yoʻnaltirishga qaror qildi.
Ammo «Sanderlend» bu shedevrdan karaxt holatga tushmadi va tezda Le Fening Brobbiga markaziy himoyachilar orasidan oʻtkazib bergan pasi orqali muvozanatni tikladi. Boʻlim oʻrtalaridan oʻtganda jamoalar yana bir martadan gol almashishdi. «Shaharliklar» raqib jarima maydoni atrofida kuchli pressing uyushtirishi Sherkining goli bilan yakunlandi, «qora mushuklar» esa bunga Mene hujumga qoʻshilib, Brobbini boʻsh darvoza qarshisiga chiqarishi bilan javob qaytarishdi.
Ammo birinchi boʻlim oxirida Enso Mareska shogirdlari hisobni baribir oʻz tomoniga ogʻdirishdi. Geyi toʻp uchun kurashda yutib chiqqanidan Semenyo qulay vaziyatda turib darvoza toʻrini «oʻqqa tutdi», biroz oʻtib Holand oʻyin taqdirini hal qilib qoʻyishi mumkin edi, ammo boʻsh darvozani ishgʻol eta olmadi.
Oʻyinga qoʻshib berilgan daqiqalarda esa Donnarumma jamoasini muqarrar goldan saqlab qoldi.
Ikkinchi boʻlimda Semenyo dublni rasmiylashtirdi, ammo bu bilan oʻyin masalasi hal boʻlmadi, mehmonlar hujumchisi Brobbi bu golga ham javob qaytardi. Niderlandiyalik futbolchi Anguloning uzatmasidan keyin het-trikka erishdi. Mehmonlar hisobni tenglashtirish uchun kuchli bosim uyushtirishdi va muntazam ravishda toʻpni raqib jarima maydoniga yetkazib turishdi. Shunday vaziyatlardan birida Donnarumma toʻpga chiqishda xatoga yoʻl qoʻydi va bu vaziyat Ruben Diash toʻpni darvoza chizigʻi ustidan olib chiqishi bilan yakunlandi.
Mavzuga oid
Bu oʻyinning burilish nuqtasiga aylandi va shundan keyin mehmonlarda hisobni tenglashtirish uchun kuch tugay boshladi. Shunday vaziyatda Holand katta sahnaga chiqdi va oʻyinga nuqta qoʻydi. Erling bu golni ham nishonlamadi, holbuki «Sanderlend» APLda ushbu norvegiyalik hujumchi gol ura olmayotgan yagona jamoa boʻlib turgandi. Endi u ligada oʻzi qarshi oʻynagan 25 jamoaning barchasiga gol urgan futbolchiga aylandi.
Asosiysi esa «Siti» «Arsenal»ning bu turda ochko yoʻqotishidan foydalanib, turnir jadvalida yakkapeshqadamga aylangani boʻldi: «shaharliklar» besh turdan keyin yuz foizlik natija qayd etgan holda xalqaro tanaffusga yoʻl oldi. Lekin Mareska shogirdlarini tanaffusdan keyin qiyin taqvim kutmoqda: jamoa APLdagi keyingi 5 oʻyinidan uchtasini «Liverpul», «Aston Villa» va «Nottinghem» kabi qiyin raqiblarga qarshi safarda oʻtkazadi.
Parallel ravishda Bornmutda kechgan uchrashuv Manchesterdagi oʻyin fonida ancha zerikarli tus oldi. Ikki jamoa ham maydon markazida ustunlikka erishish uchun yakkakurashlarga eʼtibor qaratdi va golli vaziyatlar deyarli kuzatilmadi. Birinchi boʻlimdagi eng asosiy epizod Alisson yaqin burchakka ketayotgan toʻpni olib chiqishi boʻldi. Ikkinchi boʻlimda esa oʻng qanotda oʻynagan Gakponing saʼy-harakatlaridan keyin toʻp maydonda qoldi va yakunda qulay vaziyatda turgan Isakka yetib kelib, hisob ochildi. Mersisaydliklar gʻalabali hisobni ushlab qolishdi va turnir jadvalida 6-oʻringa koʻtarilishdi.
«MU» mavsum startidagi besh oʻyinda toʻrtinchi bor ochko yoʻqotdi. «Fulhem» maydonida kechgan oʻyinning birinchi boʻlimida hisob ochilmay qoldi, ikkinchi boʻlimda esa «qizil iblislar» himoyadan chiqishda xatoga yoʻl qoʻyishdi. Maynuning xato pasi raqib qarshi hujumiga sabab boʻldi. Lammens zarbadan keyin jamoasini qutqargandi, ammo toʻp Lisandro Martinesga tekkan holda darvoza toʻriga borib tushdi. Mehmonlar faqat oʻyin oxirida shu kuni markaziy hujumchi pozitsiyasida tushgan Mateus Kunyaning goli evaziga magʻlubiyatdan qutulib qolishdi. Bunda manchesterliklarga ham omad kulib boqdi deyish mumkin, shu kuni bir necha bor ajoyib seyvlar ijro etgan Leno bu vaziyatda ham qutqarishi mumkin edi, ammo toʻp himoyachiga tekkan holda yoʻnalishini oʻzgartirib, darvoza toʻriga borib tushdi.
«Yunayted» magʻlubiyatdan qutulib qoldi, ammo jamoaning turnir jadvalidagi holati ayanchli: Maykl Kerrik shogirdlari APLning besh turidan keyin atigi 5 ochkoga ega va oʻz tarixidagi eng yomon startni takrorlamoqda.
Madrid derbisi arafasida ikki jamoa bosh murabbiylari tunneldan qalin doʻstlar kabi qoʻl ushlashib chiqib kelishdi, ammo maydonda futbolchilar bir-biriga qarshi ayovsiz dushmanlardek munosabatda boʻlishdi.
Birinchi boʻlim davomida «Atletiko» futbolchilari naq 10-marta fol ishlatishdi («Real» uchta fol bilan kifoyalangan). Bunday oʻyin uchun mezbonlar ozchilik boʻlib qolishi mumkin edi, ammo hakamlar avvaliga Kristian Romeroni, keyin esa Li Kan Inni kechirishdi.
Birinchi epizodda argentinalik himoyachi butsasining ostki qismi bilan Jud Bellinghemning tizzasini bosib olgandi. Bu vaziyatda hakam Migel Anhel Ortis Aryas avvaliga ingliz futbolchisiga sariq kartochka koʻrsatdi, ammo VAR aralashuvidan keyin bu kartochka bekor qilinib, «Atletiko» futbolchisi ogohlantirildi.
«Real» futbolchisi esa qizil kutishgandi, lekin ular butun jamoa boʻlib hakamning qaroriga taʼsir koʻrsata olishmadi.
Keyin esa Li Kan In Fede Valverdega qarshi qoʻpolligi uchun hech qanday kartochka olmadi, holbuki u butsasining ostki qismi bilan raqibning toʻpiq sohasiga zarba bergandi.
Urugvaylik futbolchi hakamga yugurib borib, eʼtiroz bildirdi, ammo Ortis Aryas koreyalik futbolchini jazolashni istamadi.
Ikkinchi boʻlim boshida esa arbitr «Real» darvozasiga penalti belgiladi, yetmaganiga Din Hausenga toʻgʻridan toʻgʻri qizil kartochka ham koʻrsatdi. Bu vaziyatda «Real» himoyachisi jarima maydoniga yorib kirgan Juliano Simeoneni ortdan ushlab qolgandi va bu soʻnggi umid foli deb baholandi.
Aleksandr Grimaldo penaltini aniq ijro etib, hisobni ochdi. Mezbonlar bu bilan toʻxtashmadi va oʻyin masalasini uzil-kesil hal qilib qoʻyish uchun oldinga tashlanishdi. 59-daqiqada Simeone yerlatib uzatma berdi, Konate va Dumfris orasidagi boʻshliqdan yorib kirgan Jonatan Devid esa darvozabonga hech qanday imkoniyat qoldirmadi. Alvaresdan asosiy tarkibni olib qoʻygan ushbu kanadalik hujumchi qatorasiga uchinchi turda gol urmoqda.
«Atletiko» son jihatdan ustunlikdan foydalanib, hisobni yirik koʻrinishga keltirishi mumkin edi, ammo Kurtua bir necha bor muqarrar goldan qutqarib qoldi. Oʻyin oxirida esa mezbonlar biroz boʻshashdi va mehmonlarda ham imkoniyatlar yuzaga kela boshladi. Avvaliga Diomande Oblakning hushyorligini sinovdan oʻtkazdi, keyingi epizodda esa Bernarduning jarima zarbasidan uzatgan pasini barchadan baland sakragan Ryudiger golga aylantirdi.
«Real» soʻnggi daqiqalarni shturm bilan oʻtkazdi, ammo «Atletiko» gʻalabani qoʻldan chiqarmadi. «Real» toʻrt yildan buyon la liga doirasida «Atletiko»ni «Metropolitano»da magʻlub etolmayapti.
Endi «Barselona» «Real»dan olti ochkoga oʻzib ketdi, ikkinchi oʻrindagi «Atletiko»dan esa besh ochko koʻp toʻplagan. Kataloniyaliklar butun mavsum davomida hozirgidek benuqson oʻyin koʻrsatishi dargumon, lekin startda yuzaga kelgan farq chempionlik masalasini hal qilib qoʻyishi mumkin.
«Betis»ni ikkinchi oʻrindan bir necha daqiqa ajratib turgandi, ammo oʻyin oxirida Natan qulay imkoniyatdan foydalana olmadi va hisobdagi ustunlik mustahkamlanmadi. Keyin esa Manuel Pellegrini jamoasi himoyada xatoga yoʻl qoʻydi va Soriano toʻpni himoyachilar ortiga ochilgan Vilyaresga tashlab berdi. Gʻalabani qoʻldan chiqargan «Betis» «Real»dan bir ochko toʻplagan holda uchinchi oʻrinda joylashgan, ammo qoʻshimcha koʻrsatkichlarga koʻra «Atletiko»ni oldinga oʻtkazib yuborgan.
