Qirgʻiziston Jogorku Keneshi (parlament) 24-sentabr kungi yigʻilishida «Qirgʻiziston Respublikasi prezidentining navbatdagi saylovini tayinlash toʻgʻrisida»gi qarorni qabul qildi.
Shunday qilib, navbatdagi prezidentlik saylovi 2027-yil 27-yanvarda boʻlib oʻtadi.
Qarorni ishtirok etgan 86 nafar deputatning barchasi qoʻllab-quvvatladi.
Qirgʻiziston Konstitutsiyasining 80-moddasi 2-qismiga koʻra, Jogorku Kenesh prezidentlik saylovini tayinlash vakolatiga ega.
Saylov toʻgʻrisidagi amaldagi konstitutsiyaviy qonunga muvofiq, navbatdagi prezident saylovi amaldagi davlat rahbarining vakolat muddati tugaydigan yilning yanvar oyi toʻrtinchi chorshanbasida oʻtkaziladi hamda ovoz berish kuniga kamida toʻrt oy qolganda Jogorku Kenesh tomonidan tayinlanadi.
Amaldagi prezident Sadir Japarov nomzodini yana bir bor qoʻyishi mumkin. Konstitutsiya bir kishiga prezidentlik kursisini ketma-ket koʻpi bilan ikki muddat egallashga ruxsat beradi. Bundan tashqari, Qirgʻiziston Konstitutsiyaviy sudi Japarovning joriy olti yillik muddatini birinchi deb tan oldi va uning 2027-yilda ikkinchi muddatga nomzodini qoʻyish huquqini tasdiqladi.
Japarovning oʻzi 2026-yil 13-avgust kuni bergan intervyusida shunday dedi: «Men yana bir muddatga nomzodimni qoʻyish va ishni davom ettirish niyatidaman».
Japarov avvalroq 2027-yilgi saylovda qatnashmay, hokimiyatni Qamchibek Tashiyevga topshirishni rejalashtirganini aytib bergan edi. Uning soʻzlariga koʻra, Tashiyev «oʻz atrofidagilarni eplay olmagan». Tashiyevning oʻzi iyul oyida 2027-yilgi saylovda ishtirok etmasligini maʼlum qilgan edi.
