Toshkent viloyatida ichimlik suvi va oqova suv xizmatlari narxi oshiriladi. Xalq deputatlari Toshkent viloyati kengashining tegishli qarori 16-sentabrda qabul qilingan. Yangi tariflar 3-oktabrdan kuchga kiradi.
«Toshkent viloyati suv taʼminoti» korxonasi tomonidan xizmat koʻrsatiladigan aholi uchun bir kub metr suvning QQS bilan birgalikdagi narxi 19,2 foizga - 2912 soʻmdan 3472 soʻmgacha, oqova suv chiqarish xizmati esa 15,4 foizga - 1456 soʻmdan 1680 soʻmgacha koʻtariladi.
Byudjet tashkilotlari va boshqa yuridik shaxslar uchun bir kub metr ichimlik suvi QQS bilan 16 800 soʻmdan 17 920 soʻmgacha (6,7 foizga), oqova suv xizmati esa 3360 soʻmdan 4480 soʻmgacha (33,3 foizga) qimmatlashadi.
«Chimyon-Chorvoq magistral suv taʼminoti» tomonidan xizmat koʻrsatiladigan hududlar uchun alohida tariflar belgilangan. Aholi uchun ichimlik suvi QQS bilan 1680 soʻmdan 1904 soʻmgacha (13,3 foizga), oqova suv chiqarish xizmati esa 1288 soʻmdan 1512 soʻmgacha (17,4 foizga) oshadi.
Maʼlumot uchun, Toshkent viloyatida ichimlik suvi va oqova suv xizmatlari narxi oxirgi marta 2025-yil 1-iyulda qimmatlashgandi.