Naked Science nashrining yozishicha, Rossiya Bosh davlat ekspertizasi loyiha hujjatlarini maʼqullagani haqidagi maʼlumot kapital qurilish obyektlari loyiha hujjatlari ekspertizasi xulosalarining yagona davlat reyestriga kiritilgan.
Bino Sankt-Peterburgning Primorskiy tumanidagi Laxta-Olgino munitsipal okrugida joylashadi. Loyihaning quruvchisi - «Sinergiya» aksiyadorlik jamiyati, texnik buyurtmachisi esa «Renkons» aksiyadorlik jamiyati hisoblanadi.
Nashrga koʻra, qurilish yakunlanganidan soʻng minora dunyoning eng baland oʻnta binosi qatoriga kirishi kutilmoqda.
Bino qanday koʻrinishda boʻladi?
Meʼmoriy konsepsiyaga muvofiq, bino hajmini markaziy, bir nechta qavat balandligini qamrab oluvchi atriumlar atrofida buralib koʻtariladigan ikkita spiralsimon shakl hosil qiladi.
Minoraning 43, 70 va 88-qavatlarida qishki bogʻlar koʻrinishidagi xollar tashkil etiladi. Ularda kafeteriylar va koʻkalamzorlashtirilgan hududlar boʻlishi koʻzda tutilgan.
Birinchi va 100-qavatlarda nooziq-ovqat tovarlari doʻkonlari, dorixona kioski va suvenir savdosi hududlarini joylashtirish rejalashtirilmoqda. Binoning yuqori qismini koʻrgazma maydoni va shahar manzarasini tomosha qilish maydonchasi egallaydi.
«Laxta Sentr - 3» Sankt-Peterburgda shakllanayotgan baland binolar majmuasining bir qismi boʻladi. Avgust boshida Rossiya Bosh davlat ekspertizasi «Laxta Sentr - 2» osmonoʻpar binosining loyiha hujjatlariga ham ijobiy xulosa bergan edi.
Shuningdek, Sankt-Peterburgning yerdan foydalanish va qurilish komissiyasi baland binolarni joylashtirish uchun moʻljallangan yer uchastkalarining yangi tasnifini maʼqullagan.
