Bangkok shahrining bir necha tumani soʻnggi kunlarda odatda butun sentabr davomida boʻladigan yogʻingarchilik miqdoriga teng yomgʻir yogʻishi oqibatida suv ostida qoldi. Tailand poytaxtidagi asosiy kanallardan suv toshib chiqqan, shahar kanalizatsiya tizimi esa yuklamani koʻtara olmagan. Koʻchalarni suv bosishi oqibatida transport harakati toʻxtab qolgan, yuzaga kelgan vaziyat olti mingga yaqin kishini suv bosgan uylardan boshpanalarga koʻchib oʻtishga majbur qilgan.
Mahalliy rasmiylar favqulodda holat eʼlon qilgan. Sentabr oyi oʻrtalaridan beri davom etgan yomgʻirlar tufayli yuzaga kelgan suv toshqinlari Tailandning 41 provinsiyasiga taʼsir koʻrsatgan. Tabiiy ofat oqibatida sakkiz kishi halok boʻlgan, 580 mingta uy xoʻjaligi zarar koʻrgan. Suv bosgan hududlardagi 80 mingdan ortiq kishi oʻz uylaridan chiqa olmay qolgan. Iqtisodchilar mamlakat iqtisodiyotiga yetkazilgan zararni kamida 11 milliard batga (327 million dollar) baholamoqda. Yogʻingarchilik hamon butun mamlakat boʻylab davom etmoqda. Keyingi kunlarda Bangkokda yogʻin kamayishi kutilmoqda. Shaharda suv sathi pasaya boshlagan. Quyida Tailand poytaxti koʻchalarida soʻnggi kunlarda kuzatilgan vaziyat aks etgan suratlar.
