Naked Science nashri xabariga koʻra, bino Antonov-Ovseyenko koʻchasida, istiqboldagi «Siti-2» majmuasi hududida joylashadi. Loyihani «Meganom» arxitektura byurosi ishlab chiqqan.
Osmonoʻpar bino yer ustidagi 95 va yer ostidagi besh qavatdan iborat boʻlishi rejalashtirilgan. Unda 1 018 ta kvartira joylashadi. Majmuaning umumiy maydoni 225 ming kvadrat metrdan oshadi.
Loyihaning rasmiy vizual tasvirlari hozircha eʼlon qilinmagan. Biroq avval tarqalgan konsepsiyalar tashqi koʻrinishi jihatidan «Jenga» stol oʻyinidagi konstruksiyaga qiyoslangan. Arxitektura yechimida bir-biriga nisbatan siljitib joylashtirilgan, tashqariga chiqib turuvchi qismlar, terrasalar, lodjiyalar va balkonlar koʻzda tutilgan.
Nashr maʼlumotiga koʻra, qurilishni «Donstroy»ning sobiq hammulkdori Maksim Blajko va Promsvyazbank tuzilmalari bilan bogʻliq kompaniya amalga oshiradi.
Xabarda qayd etilishicha, Yevropaning eng baland binosi Sankt-Peterburgdagi 462 metrli «Laxta Sentr» boʻlib qolmoqda. Moskvadagi yangi loyiha esa aynan turar joy binolari toifasida rekord oʻrnatishi kutilmoqda.
Shuningdek, avgust oyida Rossiyaning «Glavgosekspertiza» idorasi «Laxta Sentr - 2» loyiha hujjatlariga ijobiy xulosa bergan. Majmuaning ikkinchi minorasi balandligi 703 metr boʻlishi rejalashtirilgan.
