ABC News telekanali 29-sentabr kuni AQSH Mudofaa vazirligi rasmiysiga tayanib, shunday xabar berdi. Avvalroq kiberhujum haqida Military Times nashri maʼlum qilgan edi.
Pentagon vakiliga koʻra, 2025-yil oktabridan 2026-yil iyuligacha oz sonli begona foydalanuvchilar Mudofaa vazirligining Kadrlar maʼlumotlari markazi - DMDCʼda saqlanayotgan shaxsiy maʼlumotlarga ruxsatsiz kirish imkoniga ega boʻlgan.
«Bu holat aniqlanishi bilan DMDC zaiflikni darhol bartaraf etdi», - degan vazirlik vakili.
ABC News suhbatdoshining bahosicha, sizib chiqish koʻlami va oshkor boʻlgan maʼlumotlarning maxfiylik darajasi milliy xavfsizlik yuzasidan xavotir uygʻotishi mumkin. Xususan, fayllarda harbiy xizmatchilar va fuqarolik xodimlarining lavozimlari haqida maʼlumotlar boʻlgan.
Pentagonning asosiy kadrlar bazalaridan biri
DMDC Pentagonning kadrlarga oid asosiy maʼlumotlar bazalaridan biri hisoblanadi. Unda amaldagi harbiy xizmatchilar, rezervchilar, fuqarolik xodimlari, pudratchilar, pensionerlar, faxriylar va harbiylarning oila aʼzolari haqidagi hujjatlar saqlanadi.
Pentagon maʼlumotiga koʻra, hozircha qoʻlga kiritilgan maʼlumotlardan yovuz maqsadlarda foydalanilganini koʻrsatuvchi alomatlar aniqlanmagan.
Avvalroq, 23-sentabr kuni AQSH Federal qidiruv byurosi ham oʻzining ish oʻrinlari eʼlon qilinadigan saytiga ehtimoliy kiberhujum haqida xabar bergan edi. Oʻsha hodisadan qancha odam jabrlangani hozircha maʼlum emas.
