Amerikalik olimlar 12 yoshiga kelib smartfonli boʻlgan bolalar ovqatlanishda buzilishlarga koʻproq duch kelishini aniqladi. Tadqiqot natijalari JAMA Network Open jurnalida chop etildi.
Gadjetlarning taʼsirini baholash uchun mualliflar amerikalik maktab oʻquvchilarining kognitiv rivojlanishiga oid keng koʻlamli loyiha maʼlumotlarini tahlil qildi.
Maʼlum boʻlishicha, ishtirokchilarning 70 foizi - 6200 nafardan ortiq oʻsmir - 12 yoshidayoq smartfonga ega boʻlgan. Ular orasida eng koʻp uchraydigan simptom meyordan ortiq ovqatlanish boʻldi (9%). 14 yoshga kelib, smartfon egalarining qariyb 24 foizi, bu yoshda telefoni boʻlmaganlarning esa 16 foizi hech boʻlmaganda bitta simptom borligini maʼlum qilgan.
Tadqiqotchilar buning asosiy sababi sifatida ijtimoiy tarmoqlarni koʻrsatmoqda. 12 yoshli gadjet egalari oʻz-oʻzini baholashni tana vazniga ikki baravar koʻproq bogʻlagan va orttirilgan vaznni sport yoki ataylab qusish kabi zararli usullar bilan yoʻqotishga 50 foiz koʻproq harakat qilishgan.
«Oʻzingizni rasmlari sinchkovlik bilan tanlanadigan, tahrirlanadigan va filtrlardan oʻtkaziladigan inflyuyenserlar bilan taqqoslaganingizda, bu oʻz tanangizdan qoniqmaslikning ortishiga va oʻz-oʻzingizga past baho berishga olib kelishi mumkin, bu esa ovqatlanish buzilishlarining rivojlanishida xavf omiliga aylanishi mumkin», - dedi tadqiqot muallifi Jeyson Nagata.
Garchi avvalroq ekran qarshisidagi har bir qoʻshimcha soat oʻsmirlar uchun xavflarni oshirishi haqida xabar berilgan boʻlsa-da, ushbu tadqiqot aynan qurilmaning qaysi yoshda paydo boʻlishi jiddiy ahamiyatga ega ekanini aniqlaydi.
Mutaxassislarning fikricha, hatto kichik tanaffus ham bolaning ruhiyatini himoya qilishga yordam beradi. Tadqiqotda ishtirok etmagan Shimoliy Karolina universiteti (AQSH) psixologiya va neyrobiologiya professori Mitch Prinshteyn CNN telekanaliga bergan intervyusida telefon sotib olishni hech boʻlmaganda yarim yil yoki bir yilga kechiktirish ham xavflarni kamaytirishi mumkinligini taʼkidladi.
