Isroil bosh vaziri Netanyahuning BMTda navbatdagi chiqishida Isroil Gʻazoda genotsid sodir etgani haqidagi gaplarni «asrning eng katta yolgʻoni» deb atadi. Lekin Isroil Falastin zaminida sodir etayotgan bu galgi qilmishlari avvalgilariga oʻxshamaydi, bu galgi urush toʻlqinini butun dunyo salkam onlayn rejimda kuzatib bormoqda. Gʻazoda shunaqa koʻp urush jinoyatlari sodir etildiki, endi ularni rad etish imkonsiz.
2024-yil yanvarda Gʻazoni qamal qilib turgan Isroil harbiylari navbatdagi xunrezlikni sodir etadi. Ular 5 yoshli qizcha Hind Rajab, uning olti nafar qarindoshi va Falastin Qizil yarim oy jamiyati xodimlarini oʻldiradi. Bu ish xalqaro miqyosda qoralansa-da, Isroil hodisa sodir boʻlganini rad etadi. Yaqinda yahudiy davlati xunrezlikni tan oldi va surishtiruv boshlandi. Biroq huquq himoyachilari tekshiruvlar natijasiz boʻlishi, harbiylar jazosiz qolishini taxmin qilmoqda.
Tank nishonidagi Kia
2024-yil 29-yanvar kuni Hind Rajab va uning olti nafar qarindoshi Isroil harbiylari tomonidan oʻqqa tutilayotgan Gʻazodan chiqib ketishga qaror qiladi. Ular Tel al-Hava tumanidan Kia mashinasiga oʻtirib yoʻlga chiqadi. Oʻsha atrofda boʻlgan Isroil tanki mashinaga qarata snaryad otadi. Oqibatda Hindning xolasi, togʻasi va uch nafar amakivachchasi halok boʻladi. Qizcha va uning 15 yoshli yana bir amakivachchasi Hamada yaralanadi.
Hamada Falastin Qizil yarim oy jamiyatiga qoʻngʻiroq qiladi va yordam soʻrab, «roʻparamizda tank turibdi, ular bizni oʻqqa tutyapti, biz yengil mashinadamiz. Qarindoshlarimiz halok boʻlishdi», deydi. Shu paytda isroillik harbiy Hamadani otib oʻldiradi. Telefonni Hind Rajab oladi, xodimlar unga aloqani uzmaslikni, tez orada yordamga borishlarini aytishadi.
5 yoshli qizcha telefonda nima ham derdi... U hoʻng-hoʻng yigʻlab, «qoʻrqyapman, meni olib ketinglar», deydi. Qizil yarim oy jamiyati xodimlari unga harakatlanmay jim yotishni, eʼtibor tortmaslikni uqtiradi. Qizcha ular aytganday yoʻl tutadi. Hind Rajab turgan joyni isroilliklar oʻrab olgandi, Qizil yarim oy jamiyati xodimlari uning oldiga yetib borish uchun muzokara oʻtkazadi.
Bir necha soat deganda Isroil harbiylari ularni qizcha turgan joyga oʻtkazishga rozi boʻladi. Tez yordam mashinasi qizchaning oldiga qarab yoʻlga tushganda, Isroil harbiylari uni nishonga oladi. Oʻq ovozi eshitiladi va tibbiyot xodimlari bilan aloqa uziladi. Harbiylar ichida Hind Rajab boʻlgan mashinaga ham avtomatdan oʻq uzishadi. Oqibatda tibbiyot xodimlari ham, qizcha ham halok boʻladi.
