DW xabariga koʻra, laureatlar 30-sentabr kuni eʼlon qilingan. GYLA bilan birga pokistonlik huquq himoyachisi Jalila Haydar, Janubiy Afrikadagi Rural Womenʼs Assembly tarmogʻi va amerikalik sunʼiy intellekt tadqiqotchisi Timnit Gebru ham mukofotga sazovor boʻlgan.
Right Livelihood mukofoti 1980-yildan buyon Stokholmda eng dolzarb muammolarga amaliy va namunaviy yechimlar taklif qilayotgan shaxslar hamda tashkilotlarga berib kelinadi.
GYLA qanday tashkilot?
Gurjiston yosh yuristlar assotsiatsiyasi 1994-yilda, mamlakat mustaqillikka erishganidan koʻp oʻtmay tashkil etilgan. U Gurjistondagi dastlabki huquqni himoya qiluvchi nodavlat tashkilotlardan biri hisoblanadi. 2025-yil 22-dekabrdan buyon assotsiatsiyaga Tamar Oniani rahbarlik qilmoqda.
Tashkilotning asosiy vazifalari inson huquq va erkinliklarini himoya qilish hamda sogʻlom huquqiy muhit yaratishdan iborat. GYLA fuqarolarga bepul yuridik yordam koʻrsatadi, ularning manfaatlarini milliy va xalqaro sudlarda himoya qiladi.
Assotsiatsiya saylovlar va parlament faoliyatini ham kuzatadi. Shuningdek, davlat oʻz majburiyatlarini, jumladan, Gurjiston Konstitutsiyasining 78-moddasida belgilangan Yevropa integratsiyasiga oid vazifalarini qanday bajarayotganini nazorat qiladi.
DW maʼlumotiga koʻra, Human Rights Watch 2026-yilda GYLAʼni mamlakatda huquqiy himoya sohasidagi yetakchi tashkilotlardan biri deb atagan.
Dastlab assotsiatsiya yosh yuristlar va huquqshunoslik fakultetlari talabalarini birlashtirgan. Hozir esa unda Inson huquqlari boʻyicha Yevropa sudi va BMT tuzilmalarida murakkab ishlar bilan shugʻullanadigan tajribali mutaxassislar ham faoliyat yuritadi. Tashkilot tanilib ulgurgan dastlabki nomini saqlab qolgan.
Bahsli qonun va Yevropa sudiga shikoyatlar
GYLAʼning muhim faoliyat yoʻnalishlaridan biri - mahalliy hokimiyat harakatlari yoki milliy sudlar qarorlaridan norozi boʻlgan jismoniy va yuridik shaxslarga Inson huquqlari boʻyicha Yevropa sudiga murojaat qilishda yordam berish.
Assotsiatsiya Gurjiston parlamenti 2024-yil mayida qabul qilgan «Xorijiy taʼsirning shaffofligi toʻgʻrisida»gi qonunga qarshi jamoaviy shikoyatning asosiy muvofiqlashtiruvchisi boʻlgan. Qariyb 140 arizachi nomidan tayyorlangan shikoyat 2024-yil oktabrida Yevropa sudiga kiritilgan. Ishda Yevropa kengashining inson huquqlari boʻyicha komissari va Venetsiya komissiyasi uchinchi tomon sifatida qatnashgan.
