Naked Science tayyorlagan reyting Nobel tashkilotining ochiq maʼlumotlar bazasiga asoslangan. Hisob-kitobda mamlakatlarning hozirgi chegaralari inobatga olingan, laureatlarning fuqaroligi yoki qaysi davlatda ishlagani esa hisobga kiritilmagan.
Eng koʻp laureat tugʻilgan mamlakatlar quyidagicha:
AQSH - 300 nafar;
Buyuk Britaniya - 111 nafar;
Germaniya - 86 nafar;
Fransiya - 65 nafar;
Yaponiya - 31 nafar;
Shvetsiya - 30 nafar;
Rossiya - 29 nafar;
Polsha - 28 nafar;
Kanada - 23 nafar;
Niderlandiya va Italiya - 20 nafardan.
Oxirgi pogʻonada ikki mamlakatning natijasi teng boʻlgani uchun roʻyxatga jami 11 ta davlat kiritilgan.
17-oktabr holatiga koʻra, ochiq bazada 1000 nafar inson va 28 ta tashkilot haqida maʼlumot boʻlgan. Reytingga faqat insonlar kiritilgan va har bir laureat bir marta hisoblangan. Masalan, Mariya Kyuri, Jon Bardin yoki Frederik Sengerning ikki marta mukofot olgani ularni roʻyxatda ikki kishi sifatida hisoblashga asos boʻlmagan.
Tugʻilgan joyga asoslangan yondashuv fuqarolik yoki universitetlar boʻyicha tuzilgan reytinglardan farq qiladi. Masalan, 2026-yilda fizika boʻyicha mukofot olgan Frensis Halzen AQShda ishlasa-da, Belgiyada tugʻilgani uchun ushbu mamlakat hisobiga qoʻshilgan.
Sobiq imperiyalar va SSSR hududida tugʻilgan laureatlar ham tugʻilgan joyi hozir qaysi davlat tarkibida ekaniga qarab taqsimlangan. Buyuk Britaniya natijasiga bazada mamlakat nomi United Kingdom, Scotland yoki Northern Ireland deb koʻrsatilgan yozuvlar birlashtirilgan.
2026-yilgi oʻn nafar yangi laureatning uch nafari - Karl Deysserot, Robert Xoll va Maykl Vudford AQShda tugʻilgan. Peter Hegeman va Georg Nagel Germaniyada tugʻilgan boʻlsa, Belgiya, Fransiya, Yaponiya, Kanada va Janubiy Afrika hisobiga bittadan yangi laureat qoʻshilgan.
