Unga videokuzatuv kameralari, aqlli eshik qoʻngʻirogʻi, elektron qulf, termostat va harorat datchiklari kiritilgan. Barcha qurilmalarni iPhone orqali sozlash hamda «Uy» (Home) ilovasi yoki Siri yordamida boshqarish mumkin.
Home Collection’ning asosiy gʻoyasi - aqlli uyni yanada sodda va qulay qilishdan iborat. Barcha aksessuarlar yagona minimalistik uslubda ishlangan boʻlib, barqaror aloqa uchun Thread texnologiyasini qoʻllab-quvvatlaydi hamda alohida ham, oʻzaro birgalikda ham ishlay oladi. Masalan, uydan oxirgi odam chiqib ketganda, tizim avtomatik ravishda eshikni qulflaydi, kameralarni yoqadi va haroratni oʻzgartiradi. Uy egasi qaytishi oldidan esa xonani tayyorlab, u yaqinlashganda qulfni ochadi.
«Apple Home Collection aqlli uy uchun aksessuarlarni xotirjamlik bilan tanlash imkonini beradi. Soha yetakchilari boʻlmish LG Electronics va Schneider Electric bilan yaqin hamkorlikda har bir qurilmani Apple Home bilan benuqson ishlaydigan qilib yaratdik, bu esa uyni sodda, ishonchli va maxfiy boshqarishni taʼminlaydi», - dedi Apple kompaniyasining apparat taʼminotini ishlab chiqish boʻyicha vitse-prezidenti Metyu Kostello.
Videokuzatuv tizimi uchun LG masʼul boʻldi. Kompaniya 2,5K tasvir aniqligiga ega toʻrtta qurilma ishlab chiqdi. Ular odamlarni, uy hayvonlarini, avtomobillarni va joʻnatmalarni taniy oladi. Hodisa yozuvlari iCloud+ xizmatida 10 kun davomida saqlanadi, kameralar uchun alohida bulutli obuna talab etilmaydi. Tegishli tarif rejasi mavjud boʻlsa, Apple Intelligence videodagi hodisalarni matn koʻrinishida avtomatik tavsiflab beradi va oddiy matnli soʻrovlar orqali kerakli lavhalarni topish imkonini taqdim etadi.
Mazkur turkumdan mehmonlar va joʻnatmalarni kuzatish uchun ikkita kameraga ega LG Video Doorbell videoqoʻngʻirogʻi, harakat aniqlanganda avtomatik yonadigan ikkita projektorli tashqi Floodlight Cam, shuningdek, rangli tungi tasvirga oluvchi ixcham Outdoor Cam oʻrin olgan. Indoor Cam esa alohida eʼtiborga loyiq: xonadon aʼzolaridan biri uyga qaytganida uning obyektivi xonani kuzatish uchun avtomatik koʻtarilishi va tasvirga olishni toʻxtatib, pastga tushishi mumkin. Shuningdek, kameralar Wi-Fi uzilib qolgan taqdirda ham yozishda davom etishga imkon beruvchi ichki xotira bilan taʼminlangan.
Yana bir yangilik - LG Smart Deadbolt Lock elektron qulfi. Ultra Wideband texnologiyasi sharofati bilan u egasining yaqinlashayotganini sezadi va unda raqamli kalit oʻrnatilgan mos iPhone yoki Apple Watch boʻlsa, eshikni avtomatik ravishda ochadi. Shuningdek, smartfon yoki soatni tekkizib ochish, PIN-kod kiritish va oddiy kalit uchun moʻljallangan yashirin tuynuk ham koʻzda tutilgan. Qulf eshik ochilishini va buzishga boʻlgan urinishlarni qayd etib boradi, mehmonlarga esa «Uy» ilovasi orqali vaqtinchalik kirish huquqini taqdim etish mumkin.
