Kaliforniya Janubiy okrugi federal sudi AQSH Davlat departamentiga DV-2027 grin-karta lotereyasini oʻtkazish majburiyatini yukladi, deb xabar berdi Courthouse News Service.
14-oktabr kuni sudya Jinsuk Ota dasturga roʻyxatga olish kechiktirilgani sababli davlat kotibi Marko Rubioga qarshi daʼvo kiritgan Red Eagle Law yuridik firmasining iltimosnomasini qanoatlantirdi. Davlat departamentiga ariza topshirish muddatlarini eʼlon qilish, roʻyxatga olishni boshlash va saralab olingan ishtirokchilarning arizalarini koʻrib chiqish majburiyati yuklatildi.
«Eʼlonda roʻyxatga olishning boshlanish va yakunlanish sanasi, elektron arizalarni topshirish sayti hamda ishtirokchilarga qoʻyiladigan talablar koʻrsatilishi shart», – deyiladi qarorda.
Sud qaroriga koʻra, Davlat departamenti quyidagilarni amalga oshirishi shart:
1-noyabrdan kechiktirmay DV-2027 uchun roʻyxatga olishni boshlash;
arizalarni 30 kun davomida qabul qilish;
saralab olingan ishtirokchilarni 3-dekabrdan kechiktirmay xabardor qilish.
Muddatlar AQSH sharqiy vaqti boʻyicha belgilangan. Bunda 1-noyabr – roʻyxatga olishni boshlashning eng soʻnggi muddati hisoblanadi. Arizalarni qabul qilish boshlanadigan aniq sanani idora keyinroq eʼlon qilishi lozim.
Dastur uchun roʻyxatga olish jarayoni 2025-yil kuzida oʻtkazilishi kerak edi. Biroq 5-noyabr kuni Davlat departamenti ishtirok etish tartibini oʻzgartirayotganini va yangi sanalarni keyinroq eʼlon qilishini bildirdi. 2026-yil avgust oyida Red Eagle Law lotereya boshlanishiga erishish maqsadida sudga murojaat qildi.
Diversity Visa dasturi AQShga immigratsiya darajasi nisbatan past boʻlgan mamlakatlardan chiqqan shaxslar uchun har yili 55 mingtagacha viza ajratishni nazarda tutadi. Lotereyada gʻolib chiqish viza uchun ariza topshirish imkoniyatini beradi, biroq avtomatik tarzda grin-karta olishni anglatmaydi. Ishtirokchilar dastur talablariga mos kelishini tasdiqlashi va belgilangan jarayonlardan oʻtishi zarur.
Donald Tramp oʻzining birinchi prezidentlik muddatidayoq grin-karta oʻynalishiga qarshi chiqqan edi. 2025-yil dekabr oyida u Braun universitetidagi otishmada gumon qilinuvchi aynan shu dastur orqali AQSH hududiga kirib kelganini roʻkach qilib, uni toʻxtatib qoʻydi.
