DW nashri Financial Times’ga tayanib xabar berishicha, rejani AQSH prezidentining maxsus vakili Stiven Uitkoff va Trampning kuyovi Jared Kushner Mayamida Ukraina hamda Yevropa davlatlari vakillari bilan oʻtkazilgan yaqindagi uchrashuvda taqdim etgan.
Taklif Rossiyaning muzlatilgan aktivlarining bir qismini Vashington nazoratidagi maxsus moliyaviy tuzilmaga oʻtkazishni nazarda tutgan.
Gazeta suhbatdoshlarining aytishicha, Yevropa vakillari aktivlar ustidan nazoratni AQShga berishga ham, muzlatilgan mablagʻlarning biror qismini Rossiyaga qaytarishga ham qarshi chiqqan.
Uitkoff va Kushnerning taklifi Ukraina rasmiylari va yevropalik diplomatlarda Vashingtonning Rossiyaga bosim oʻtkazishga qaratilgan yondashuvi yuzasidan xavotir uygʻotgan.
FT maʼlumotiga koʻra, 2022-yil fevralda Gʻarb davlatlari Rossiyaning qariyb 260 milliard yevrolik davlat aktivlarini muzlatgan. Ularning asosiy qismi Yevropa Ittifoqida saqlanmoqda.
YEI hozircha ushbu aktivlarning oʻzini Ukrainaga bermagan. Kiyevga moliyaviy yordam koʻrsatish uchun ulardan olinayotgan daromadlardan foydalanilmoqda.
Jumladan, Ukraina «Katta yettilik» mamlakatlaridan muzlatilgan aktivlarning foiz daromadlari bilan taʼminlangan 45 milliard yevrolik kredit olgan.
Nashrning yozishicha, YEI rahbarlari Rossiya urush tugaganidan keyin reparatsiya toʻlamasa, ushbu aktivlardan Ukrainani tiklashni moliyalashtirish uchun foydalanishga vaʼda bergan.
FT manbalari Rossiya aktivlarini muzlatishdan chiqarish uchun YeIning barcha aʼzo davlatlari bir ovozdan rozilik berishi kerakligini taʼkidlagan. Bu esa AQSH vakillari taklifini amalga oshirishni qiyinlashtiradi.
