Uzbekistan Airports AJ maʼlumotiga koʻra, Fargʻonada stansiya 15-oktabr kuni oʻrnatilgan. Samarqandda esa shunday uskunalarni oʻrnatish va sozlash ishlari 9-oktabrda yakunlangan. Keyinchalik boshqa aeroportlar yaqinida ham stansiyalar oʻrnatish rejalashtirilgan.
Uskunalar aeroportlarning sanitariya-himoya zonalarida joylashtirilmoqda. Ular azot dioksidi, oltingugurt dioksidi, uglerod oksidi, ozon, ammiak va vodorod sulfid, shuningdek, PM2.5 hamda PM10 mayda zarrachalari konsentratsiyasini oʻlchaydi.
Tizim bir vaqtning oʻzida havo harorati va namligi, atmosfera bosimi, shamol tezligi hamda yoʻnalishini ham qayd etadi.
Oʻlchov natijalari avtomatik ravishda Atrof tabiiy muhit monitoringi tizimining yagona geoaxborot maʼlumotlar bazasiga uzatiladi. Bu aeroportlar atrofidagi havo sifati qanday oʻzgarayotganini kuzatib borish imkonini beradi.
