Osmonoʻpar bino qiymati 9 milliard dollarlik Ellinikon shaharsozlik loyihasining asosiy inshootlaridan biri boʻladi. Qurilish maydoni Afina Riverasida - Pirey portidan Poseydon ibodatxonasigacha choʻzilgan sohil hududida joylashgan. Uning maydoni Monako hududidan taxminan uch baravar katta.
Loyiha doirasida bir nechta turar joy mahallasida minglab uylar, Hard Rock mehmonxonasi va kazinosi, savdo markazi hamda yangi jamoat plyaji barpo etilishi rejalashtirilgan.
Shuningdek, sport majmuasi, maktablar, ofislar va tibbiyot muassasalari quriladi. Katta bogʻda esa ikki million kvadrat metr yashil hudud tashkil etilishi koʻzda tutilgan.
Riviera Tower atrofidagi bahslarning asosiy sababi uning balandligi va Afinaning tarixiy qiyofasiga taʼsiridir. Shaharda binolar balandligi odatda 32 metr bilan cheklanadi. Bu Akropol va undagi Parfenonga ochiq manzarani saqlab qolishga xizmat qiladi.
200 metrli minora va butun Ellinikon loyihasi esa amaldagi qurilish meyorlaridan istisno tariqasida ruxsat olgan. Shu bois yangi bino atrofdagi pastqavatli imoratlar orasida keskin ajralib turadi.
Manbada keltirilgan 2025-yilgi soʻrov natijalariga koʻra, respondentlarning 63 foizi Riviera Tower qurilishiga qarshi chiqqan. Hududni qayta qurishga qaratilgan butun Ellinikon loyihasini esa 41 foiz ishtirokchi qoʻllab-quvvatlamagan.
Tarixiy markazdan maʼlum masofada joylashganiga qaramay, osmonoʻpar binoning shahar manzarasiga taʼsiri tanqidchilarning asosiy eʼtirozlaridan biri boʻlib qolmoqda. Loyiha Afinada zamonaviy qurilish bilan qadimiy meʼmoriy merosni asrash oʻrtasidagi muvozanat masalasini kun tartibiga olib chiqqan.
