La liga, 9-tur
«Betis» – «Barselona» 2:5
Gollar: Yamal, 10 (0:1). Gomes, 27 (1:1). Rodri, 41 (1:2). Gabriel Jezus, 51 (1:3). Azzalzuliy, 53 (2:3). E. Garsiya, 62 (2:4). Olmo, 81 (2:5)
«Betis»: Vales, Liorente, Gomes, F. Garsiya, Bellerin (Ortis, 70), Bernal, Sebalios (Deossa, 46), Pablo Fornals (Fidalgo, 70), Azzalzuliy, Lo Selso (Rikelme, 64), Ernandes (Perrott, 64)
«Barselona»: X. Garsiya, Kubarsi, Martin (E. Garsiya, 46), Espart, Kunde, Pedri, Rodri, Fermin Lopes (Olmo, 62), Adeyemi (Gordon, 62), Yamal (Rafinya, 70), Gabriel Jezus (Gavi, 80)
Ogohlantirishlar: Bellerin, 22. Liorente, 61 – Fermin Lopes, 20. Yamal, 55
Chetlatish: Bernal, 54
Toʻqqiz turda toʻqqiz gʻalaba: «Barselona» Ispaniya chempionatini rekord seriya bilan boshlash boʻyicha «Real» tomonidan 1968/1969-yillar mavsumida oʻrnatilgan rekordni takrorladi. Ammo Sevilyada kechgan oʻyin koʻk-anorranglilar uchun oson kechmadi.
«Barselona» toʻrt kun oldin Chempionlar ligasida oʻynagandi, keyingi hafta esa Hans-Diter Flik shogirdlarini YeChLda «PSJ», La ligada «Real»ga qarshi janglar kutmoqda. Shunga qaramay, bosh murabbiy Istanbulda oʻynagan tarkib bilan solishtirganda katta rotatsiyaga qoʻl urmadi.
Oʻyin debyutida «Barselona» toʻpni nazorat qildi, «Betis» esa 4-4-2 sxemasida oʻrta blokda himoyalandi, hujumdagi Fornals va Ernandes himoyaning birinchi chizigʻini tashkil etishdi. Kataloniyaliklar 10 daqiqa davomida raqib himoyasiga kalit qidirishdi, keyin esa ilk zarbaniyoq golga aylantirishdi. Yamal bir himoyachini ikki bor aldab, toʻpni jarima maydoniga kirmasdan olis burchakka yoʻnaltirdi.
Birinchi boʻlim oʻrtalaridan oʻtganda mezbonlar standart vaziyatdan javob qaytarishdi. Burchak zarbasidan keyin himoyachilar toʻpni uzoqlashtira olishmadi va unga ega chiqqan Fornals Gomesni golli pas bilan taʼminladi.
Hisob tenglashgach, oʻyin ochildi – boʻlim oxiriga qadar ikki jamoada ham navbati bilan golli vaziyatlar yuzaga keldi. Tanaffus arafasida Flik jamoasi ham burchak zarbasidan gol urdi. Fermin toʻpni jarima maydoni markaziga yetkazdi, Rodri esa bosh bilan darvozani ishgʻol etib, kataloniyaliklar safidagi ilk golini nishonladi.
Koʻp oʻtmay Lo Chelso ham Yamaldan kam boʻlmagan shedevr zarba ijro etdi, ammo VAR vaziyatga aralashib, Kucho Ernandes toʻpni qoʻl bilan oʻynagani uchun bu golni bekor qildi. Lekin toʻp qoʻlga tekkan vaziyat hujumning oldingi fazasida roʻy bergan, gol esa hujum qaytadan boshlanganda urilgandi.
