DW xabariga koʻra, Tramp bu haqda 18-oktabr kuni Truth Social ijtimoiy tarmogʻida yozgan. Isroil parlamenti - Knessetga saylovlar 27-oktabrga belgilangan.
AQSH prezidenti Netanyahuni qoʻllashini Eronga qarshi hamkorlik bilan bogʻlagan. Uning aytishicha, Isroilga boshqa rahbar kelsa, Vashington Eronga mustaqil qarshi turishiga toʻgʻri keladi. Tramp bunday yoʻl tutish niyati yoʻqligini taʼkidlagan.
Shuningdek, u Netanyahu hukumati bilan birgalikda Eron rejimiga harbiy va moliyaviy jihatdan zarba berilayotganini daʼvo qilgan. Tehron oʻz siyosatini oʻzgartirmasa, bosim davom etishini bildirgan.
The Jerusalem Post keltirgan soʻrov natijalariga koʻra, «Likud» saylovda 19 ta, Isroil armiyasining sobiq bosh qoʻmondoni Gadi Ayzenkotning «Yashar» partiyasi esa 22 ta mandat olishi mumkin. Biroq hukumat tarafdorlari va muxolifat bloklarining umumiy imkoniyatlari bir-biriga yaqinligicha qolmoqda.
Knessetda koʻpchilikni shakllantirish uchun 120 oʻrindan kamida 61 tasini birlashtirish zarur. Shu bois alohida partiyaning birinchi oʻrinni egallashi uning hukumat tuzishini avtomatik ravishda taʼminlamaydi.
AP agentligiga koʻra, ehtimoliy ssenariylardan biri - muxolifatning soʻl, markazchi va oʻng partiyalarni bir koalitsiyaga birlashtirishga urinishi. Ikkinchi variant esa Netanyahu partiyasining oʻta oʻng siyosiy kuchlar bilan ittifoqini davom ettirishidir.
Bunday sharoitda arab partiyalari muhim oʻrin tutishi mumkin. Ular manfaatlarini ifodalaydigan arab aholi mamlakatda ovoz berish huquqiga ega fuqarolarning taxminan 20 foizini tashkil etadi. Soʻrovlarda arab partiyalariga 13–15 ta mandat prognoz qilinmoqda.
Biroq siyosiy kuchlar oʻrtasidagi kelishmovchiliklar koalitsiya tuzishni qiyinlashtirishi mumkin. AP bahosiga koʻra, hech bir tomon parlament koʻpchiligini shakllantira olmasa, Isroilda siyosiy inqiroz choʻzilishi va yana saylov oʻtkazilishi ehtimoli bor.
