DW xabariga koʻra, Tramp bu haqda 18-oktabr kuni Truth Social ijtimoiy tarmogʻida yozgan.
AQSH prezidentining aytishicha, hozir Rossiya va Ukraina oʻrtasidagi urushni tugatish boʻyicha muzokaralar olib borilmoqda. U yangi cheklovlar Moskvani muzokaralardan uzoqlashtirishi mumkin deb hisoblaydi.
Tramp Rossiya bilan muloqotda, xususan, mahbuslarni ozod qilish masalasida «sezilarli siljish» boʻlganini aytgan. Shu sababli hozircha yangi sanksiyalarni ishga tushirishni istamayotganini bildirgan.
Ikkinchi sabab sifatida u Rossiyaning Eronga munosabatini keltirgan. Trampning daʼvosiga koʻra, Moskva Tehronga oʻz imkoniyatlariga nisbatan juda kam yordam bermoqda. AQSH prezidenti bu holat saqlanib qolishini xohlashini yozgan.
Shu bilan birga, Tramp Ukraina prezidenti Volodimir Zelenskiyni Rossiyaning neftni qayta ishlash zavodlariga hujumlar uchun yana tanqid qilgan. Uning fikricha, dizel yoqilgʻisi ishlab chiqariladigan korxonalarga zarbalar jahon bozoriga, jumladan, AQSH fermerlari va biznesiga zarar yetkazmoqda.
Tramp Zelenskiyni urushni tugatishga intilmayotganlikda ham ayblagan. Bu AQSH prezidentining bayonoti boʻlib, u Ukraina rahbari avvalroq hozirgidan yaxshiroq shartlarda kelishuvga erishishi mumkin edi, degan fikrni bildirgan.
«Doʻzaxiy sanksiyalar» nomi bilan tanilgan Grem qonuni Rossiya tovarlariga 500 foizlik qoʻshimcha boj joriy etishni nazarda tutadi. Shuningdek, Rossiya nefti va gazining eng yirik besh xaridori qatoridagi hamda Moskvaga sanksiyalarni chetlab oʻtishda eng faol yordam berayotgan davlatlar mahsulotlariga 100 foizlik boj qoʻllash koʻzda tutilgan.
Qonun cheklovlarni 18-oktabrgacha joriy etishni talab qilgan, biroq AQSH milliy manfaatlariga mos kelsa, prezidentga bu jarayonni toʻxtatib turish imkonini ham bergan. Tramp ana shu vakolatdan foydalangan.
