Nodavlat (xususiy) taʼlim tashkilotlarida huquqbuzarliklarning oldini olish uchun ichki ishlar organlari xodimi lavozimini joriy etish taklif qilindi. Bu Ichki ishlar vazirligi tomonidan tayyorlangan Vazirlar Mahkamasi qarori loyihasida nazarda tutilgan. Hujjat normativ-huquqiy hujjatlar loyihalari muhokamasi portaliga joylashtirildi.
Loyihaga koʻra, 2026-yil 1-sentabrdan nodavlat taʼlim tashkilotlarida yangi shtat birliklarini muassasalarning oʻz mablagʻlari hisobidan tashkil etishga ruxsat berish taklif qilinmoqda.
Loyihada oliy taʼlim tashkilotlarida profilaktika katta inspektori va xotin-qizlar masalalari boʻyicha katta inspektor lavozimini, oʻrta va oʻrta maxsus taʼlim tashkilotlarida esa voyaga yetmaganlar masalalari boʻyicha (katta) inspektor-psixolog lavozimini joriy etish nazarda tutilgan.
Inspektorning asosiy vazifalari qatoriga oʻquvchi va talabalar oʻrtasida huquqbuzarlik, zoʻravonlik, bulling, giyohvandlik va ekstremistik gʻoyalar taʼsirining oldini olish kiritilgan. Ular huquqbuzarliklarga sabab boʻlayotgan omillarni aniqlash va bartaraf etish choralarini koʻrishda ham ishtirok etadi.
Hujjat loyihasida tazyiq va zoʻravonlikka uchragan oʻquvchilarning huquqlari va xavfsizligini taʼminlash choralari ham nazarda tutilgan.
Loyihaga koʻra, nodavlat taʼlim tashkilotlari ichki ishlar organlari xodimlari uchun xizmat xonasini ajratishi, uni taʼmirlashi va mebel, aloqa vositalari hamda kompyuter jamlanmasi bilan jihozlashi kerak boʻladi.
Loyiha muhokamasi 3-noyabrgacha davom etadi.
