Litvaning LRT teleradiokompaniyasi xabariga koʻra, Sinkyavichyus bu haqda 19-oktabr kuni Vilnyusda Milliy xavfsizlik komissiyasi yigʻilishidan soʻng gapirgan.
Bosh vazirning aytishicha, apparatning Ukrainaga tegishli ekanini topilgan parchalar, Ukraina tomonining murojaati va hujum paytida dronlardan biri bilan aloqa yoʻqolgani haqidagi maʼlumotlar tasdiqlamoqda.
«Ehtimol, aynan shu dron Litva Respublikasi hududida portlagan. U portlovchi modda olib yurganiga shubha yoʻq», - degan Sinkyavichyus.
U avval mamlakatga dronlar Belarus tomondan kirib kelganini, bu safar esa apparat Polsha yoʻnalishidan uchib kelganini taʼkidlagan.
Havoga koʻtarilgan qiruvchilar harakatlanayotgan obyektni radarlarida qayd etgan. Biroq noqulay ob-havo tufayli uchuvchilar uni bevosita koʻrib, aniqlash imkoniga ega boʻlmagan.
Sinkyavichyusning soʻzlariga koʻra, dron qulashining aniq sababi hali maʼlum emas. Ehtimollar orasida texnik nosozlik, yonilgʻi tugashi, yer yoki daraxtlarga urilish bor.
18-oktabr tongida nomaʼlum obyekt bilan bogʻliq holat sabab Litva va Latviyada havo hujumi xavfi haqida ogohlantirish berilgan. NATO boʻyicha ittifoqchilarning harbiy aviatsiyasi ham jalb qilingan. Dron parchalari Litvaning Pasvalis tumanidagi Yuodjonis qishlogʻidan topilgan.
Ukraina Tashqi ishlar vazirligi oʻsha kuni hodisa yuzasidan afsus bildirgan. Vazirlik izohiga koʻra, Rossiya hududidagi harbiy nishonlarga qarshi operatsiya vaqtida dron Rossiyaning radioelektron kurash vositalari taʼsirida yoʻnalishini oʻzgartirgan boʻlishi mumkin. Bu ehtimol hozircha hodisaning tasdiqlangan sababi sifatida eʼlon qilinmagan.
