Qarorga koʻra, 2026-yil oktabr – dekabr oylarida tajriba-sinov tariqasida Pensiya jamgʻarmasining quyidagi tuman (shahar) boʻlimlaridagi pensiya va boshqa toʻlovlarni tayinlash hamda toʻlash bilan bogʻliq vazifalar hududiy boshqarmalarga oʻtkaziladi:
Andijon viloyati – Andijon shahri va Oltinkoʻl tumani;
Samarqand viloyati – Samarqand shahri;
Xorazm viloyati – Urganch va Xiva shaharlari hamda Shovot va Yangiariq tumanlari;
Sirdaryo viloyati – tuman (shahar) boʻlimlari.
Hududiy boshqarmalarda har bir tuman (shahar) uchun 3 kishidan iborat komissiya, tuman (shahar) boʻlimlarida esa fuqarolarga xizmat koʻrsatuvchi xodimlar faoliyati tashkil etiladi.
Davlat pensiyalarini tayinlash va toʻlash tartibi toʻgʻrisidagi nizomga oʻzgartirishlar kiritildi. Unga koʻra, quyidagi xizmatlar fuqaroning murojaatini talab etmagan holda proaktiv shaklda koʻrsatiladi:
nogironlik guruhi qayta belgilanganda yoki muddati uzaytirilganda nogironlik pensiyasi toʻlovini davom ettirish;
I guruh nogironligi belgilanganda pensiyani qayta hisoblash;
oila aʼzolari soni oʻzgarganda boquvchisini yoʻqotganlik pensiyasi toʻlovini davom ettirish;
100 yoshga toʻlgan fuqarolarga qoʻshimcha toʻlovni tayinlash va toʻlash;
ID-karta muddati tugashi yoki muddatidan oldin yangilanishi munosabati bilan pensiya toʻlovini davom ettirish.
Komissiya ariza tushgandan keyin oʻn kun ichida tegishli qaror qabul qiladi.
Pensiya jamgʻarmasi bir oy muddatda Oʻzbekistondan tashqarida boʻlgan pensionerlarning pensiya toʻlovlarini olish huquqini tasdiqlashda “MyID” axborot tizimi orqali shaxsni tasdiqlash imkonini yaratadi.
